കേരളത്തിലെ ഉന്നതവിദ്യാഭ്യാസ മേഖലയിൽ കാലോചിതമായ മാറ്റങ്ങൾക്കും നവീകരണങ്ങൾക്കും ഊന്നൽ നൽകിക്കൊണ്ട് ഗവൺമെന്റ് കോളേജ് ടീച്ചേഴ്സ് ഓർഗനൈസേഷൻ (GCTO) സംഘടിപ്പിച്ച “ഷെയർ ആൻഡ് ലേൺ പ്രോഗ്രാം, ടീച്ചേഴ്സ് കണക്ട് 2026” കണ്ണൂരിൽ സമാപിച്ചു. ഉന്നത വിദ്യാഭ്യാസ രംഗത്തെ പുത്തൻ പ്രവണതകളും അധ്യാപകരുടെ പങ്കാളിത്തവും ചർച്ച ചെയ്ത പരിപാടിക്ക് സമാപനമായി.
സമ്മേളനത്തിൽ നാല് വർഷ ബിരുദ കോഴ്‌സിന്റെ സാധ്യതകളും, നേരിടേണ്ടി വരുന്ന വെല്ലുവിളികളും, അവയ്ക്കുള്ള പരിഹാര മാർഗ്ഗങ്ങളും വിശദമായി ചർച്ച ചെയ്തു. സമാപന സമ്മേളനം കണ്ണൂർ പാർലമെന്റംഗം കെ. സുധാകരൻ എം.പി
വീഡിയോ സന്ദേശത്തിലൂടെ ഉദ്ഘാടനം ചെയ്തു. വൈദ്യുതി, പാർലമെന്ററികാര്യ മന്ത്രി അഡ്വ. സണ്ണി ജോസഫ് ചടങ്ങ് ഔദ്യോഗികമായി ഉദ്ഘാടനം നിർവഹിച്ചു.
കണ്ണൂർ ഡി.സി.സി പ്രസിഡന്റ് മാർട്ടിൻ ജോർജ് മുഖ്യാതിഥിയായ ചടങ്ങിൽ ജി.സി.ടി.ഒ സംസ്ഥാന പ്രസിഡന്റ് പ്രൊഫ. ഗ്ലാഡ്സ്റ്റൺ രാജ് എസ്., പ്രൊഫ. ജിനോ സെബാസ്റ്റ്യൻ തുടങ്ങിയവർ സംസാരിച്ചു. സംസ്ഥാന ജനറൽ സെക്രട്ടറി ഡോ. ഷിനിൽ ജയിംസ് ‘ടീച്ചേഴ്സ് കണക്ട്’ റിപ്പോർട്ട് അവതരിപ്പിച്ചു. സംസ്ഥാന ട്രഷറർ പ്രൊഫ. രാജേഷ് സി., സംസ്ഥാന വൈസ് പ്രസിഡന്റ് ഡോ. മുഹമ്മദ് അഷ്‌ഫാസ് എന്നിവരും ചർച്ചകളിൽ പങ്കെടുത്തു.
പരിപാടിയുടെ ഭാഗമായി നടന്ന യാത്രയപ്പ് സമ്മേളനം കണ്ണൂർ കോർപ്പറേഷൻ മേയർ പി. ഇന്ദിര ഉദ്ഘാടനം ചെയ്തു. അധ്യാപകരുടെ കൂട്ടായ്മയും ചർച്ചകളും ഉന്നതവിദ്യാഭ്യാസ മേഖലയ്ക്ക് പുതിയ ദിശാബോധം നൽകുമെന്ന വിലയിരുത്തലോടെയാണ് പരിപാടി സമാപിച്ചത്.
