യു.എസ് വിദേശകാര്യ പ്രതിനിധി മാർക്കോ റൂബിയോ മുംബൈയിലെത്തിയതിന് പിന്നാലെ, കേന്ദ്ര പെട്രോളിയം മന്ത്രി ഹർദീപ് സിങ് പുരിയും അന്താരാഷ്ട്ര ലൈംഗിക കുറ്റവാളി ജെഫ്രി എപ്സ്റ്റീനും ഒന്നിച്ചുള്ള ചിത്രം അമേരിക്കൻ നീതിന്യായ വകുപ്പ് പുറത്തുവിട്ട സംഭവം കേന്ദ്ര സർക്കാരിനെ കടുത്ത പ്രതിരോധത്തിലാക്കി. വിഷയത്തിൽ രൂക്ഷവിമർശനവുമായി പ്രതിപക്ഷ നേതാവ് രാഹുൽ ഗാന്ധി രംഗത്തെത്തി. "പ്രിയപ്പെട്ട ബി.ജെ.പി, ആർ.എസ്.എസ് പ്രവർത്തകരേ, ഏത് രാജ്യദ്രോഹിയെയാണ് അവർ ഭീഷണിപ്പെടുത്തുന്നതെന്നാണ് നിങ്ങൾ കരുതുന്നത്?" എന്ന് രാഹുൽ എക്സിൽ കുറിച്ചു. പ്രതിപക്ഷ പാർട്ടികൾ വിഷയം ഏറ്റെടുത്തതോടെ സംഭവം ദേശീയതലത്തിൽ വലിയ രാഷ്ട്രീയ ചർച്ചയായി മാറിയിട്ടുണ്ട്.
എപ്സ്റ്റീനുമായി കേന്ദ്രമന്ത്രി ഹർദീപ് സിങ് പുരി നടത്തിയ സ്വകാര്യ കൂടിക്കാഴ്ചയിൽ കേന്ദ്ര സർക്കാർ അടിയന്തരമായി വ്യക്തത വരുത്തണമെന്ന് പ്രതിപക്ഷം ആവശ്യപ്പെട്ടു. ഈ ചർച്ചകളുടെ യഥാർത്ഥ ഉള്ളടക്കവും വിവരങ്ങളും പൊതുസമൂഹത്തിന് മുന്നിൽ വെളിപ്പെടുത്തണമെന്ന് കോൺഗ്രസ്, തൃണമൂൽ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ആവശ്യപ്പെട്ടു. നയതന്ത്രപരമായ ആവശ്യമായിരുന്നു എന്ന് പറഞ്ഞ് ഈ കൂടിക്കാഴ്ചയെ ന്യായീകരിക്കാൻ സർക്കാരിന് കഴിയില്ലെന്നും പ്രതിപക്ഷ നേതാക്കൾ ചൂണ്ടിക്കാട്ടി.
