ന്യൂഡല്‍ഹി: ചൈനീസ് വിഷയത്തില്‍ പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമര്‍ശനവുമായി കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ. ചൈനയ്ക്ക് നല്‍കിവരുന്ന 'ക്ലീന്‍ ചിറ്റ്' അവസാനിപ്പിക്കണമെന്നും രാജ്യത്തിന് മുന്നില്‍ പ്രധാനമന്ത്രി സത്യം തുറന്നുപറയണമെന്നും ആവശ്യപ്പെട്ട് അദ്ദേഹം 'എക്‌സ്' (X) പ്ലാറ്റ്ഫോമില്‍ പോസ്റ്റ് ചെയ്തു. ദേശീയ സുരക്ഷ, സാമ്പത്തിക സുരക്ഷ, നയതന്ത്ര ഉത്തരവാദിത്തം എന്നീ മൂന്ന് പ്രധാന വിഷയങ്ങളിലാണ് അദ്ദേഹം പ്രധാനമന്ത്രിയോട് ചോദ്യങ്ങള്‍ ഉന്നയിച്ചിരിക്കുന്നത്.
1. ദേശീയ സുരക്ഷയും അരുണാചല്‍ പ്രദേശിലെ സാഹചര്യവും:
അരുണാചല്‍ പ്രദേശില്‍ ചൈനീസ് പീപ്പിള്‍സ് ലിബറേഷന്‍ ആര്‍മി നടത്തുന്ന കടന്നുകയറ്റങ്ങള്‍ തുടരുന്നുവെന്ന ഇന്‍ഡോ-ടിബറ്റന്‍ ബോര്‍ഡര്‍ പോലീസ് ഡയറക്ടര്‍ ജനറലിന്റെ സ്ഥിരീകരണം അങ്ങേയറ്റം ആശങ്കാജനകമാണെന്ന് ഖാര്‍ഗെ ചൂണ്ടിക്കാണിച്ചു. ഡോക്ലാമിനും ഗല്‍വാനും ശേഷം മറ്റൊരു ഗുരുതരമായ ഏറ്റുമുട്ടല്‍ കൂടി നടക്കുകയാണോ? ആഗസ്റ്റില്‍ ടാക്സിംഗിന് സമീപം ചൈനീസ് കടന്നുകയറ്റം ഉണ്ടായതായി റിപ്പോര്‍ട്ടുകള്‍ വന്നിരുന്നു. വച്ചാ-ദാമൈയില്‍ കോര്‍ കമാന്‍ഡര്‍ തല ചര്‍ച്ചകള്‍ നടന്ന് 47 ദിവസങ്ങള്‍ കഴിഞ്ഞിട്ടും ഏറ്റുമുട്ടലുകള്‍ തുടരുകയാണ്. ഇന്ത്യയുടെ പട്രോളിംഗ് അവകാശം നഷ്ടപ്പെട്ടിട്ടുണ്ടോ? അരുണാചല്‍ പ്രദേശ് ഇന്ത്യയുടെ അവിഭാജ്യ ഘടകമാണ്, എന്തുകൊണ്ടാണ് ഇക്കാര്യങ്ങള്‍ രാജ്യത്തുനിന്ന് മറച്ചുവെക്കുന്നത്? തുടങ്ങിയ ചോദ്യങ്ങള്‍ അദ്ദേഹം ഉന്നയിച്ചു.
2. സാമ്പത്തിക സുരക്ഷയും ചൈനീസ് ഇറക്കുമതിയും:
ഗല്‍വാനില്‍ 20 ഇന്ത്യന്‍ സൈനികര്‍ വീരമൃത്യു വരിച്ചതുമുതല്‍ (2020-21 സാമ്പത്തിക വര്‍ഷം) ചൈനയില്‍ നിന്നുള്ള ഇറക്കുമതി 102 ശതമാനം വര്‍ധിച്ചുവെന്നും, ഇന്ത്യയുടെ വ്യാപാരക്കമ്മി 112.16 ബില്യണ്‍ ഡോളറായി (155% വര്‍ധന) ഉയര്‍ന്നുവെന്നും ഖാര്‍ഗെ വ്യക്തമാക്കി. ഇന്ത്യന്‍ കയറ്റുമതിയെ ചൈന തടസ്സപ്പെടുത്തുന്നുവെന്ന് ധനമന്ത്രി നിര്‍മ്മല സീതാരാമന്‍ പോലും സമ്മതിക്കുന്നുണ്ട്. എന്നിട്ടും ചൈനീസ് നിക്ഷേപ നിയന്ത്രണങ്ങള്‍ സര്‍ക്കാര്‍ ലഘൂകരിക്കുകയാണ്. 'മേക്ക് ഇന്‍ ഇന്ത്യ' എന്നത് 'ചൈനയില്‍ നിന്നുള്ള ഇറക്കുമതി'യായി മാറിയോ എന്നും അദ്ദേഹം ചോദിച്ചു.
3. നയതന്ത്ര പരാജയങ്ങള്‍:
പ്രധാനമന്ത്രി മോദിയും ഷി ജിന്‍പിങ്ങും തമ്മില്‍ കുറഞ്ഞത് 23 തവണയെങ്കിലും കൂടിക്കാഴ്ചകളും ചര്‍ച്ചകളും നടന്നിട്ടുണ്ട്. ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ നേതൃത്വത്തില്‍ 25 തവണ പ്രത്യേക പ്രതിനിധിതല ചര്‍ച്ചകളും 36 ഡബ്ല്യു.എം.സി.സി. (WMCC) യോഗങ്ങളും എസ്.സി.ഒ., ബ്രിക്‌സ് ഉച്ചകോടികളും നടന്നു. എന്നാല്‍ ഈ ഇടപെടലുകള്‍ എന്ത് വ്യക്തമായ ഫലമാണ് നല്‍കിയത്? 2020 മെയ് മാസത്തിന് മുമ്പുള്ള ഇന്ത്യയുടെ പട്രോളിംഗ് അവകാശങ്ങള്‍ പൂര്‍ണ്ണമായി വീണ്ടെടുക്കാന്‍ കഴിഞ്ഞിട്ടുണ്ടോയെന്ന് ഖാര്‍ഗെ ആരാഞ്ഞു.
ദേശീയ സുരക്ഷയ്ക്ക് ഉത്തരവാദിത്തമാണ് ആവശ്യമെന്നും അദ്ദേഹം വ്യക്തമാക്കി. പ്രതിപക്ഷത്തെ ആക്രമിക്കുന്നതിന് പകരം പ്രധാനമന്ത്രി മോദി പാര്‍ലമെന്റിനെയും രാജ്യത്തെയും വിശ്വാസത്തിലെടുക്കണമെന്നും ഖാര്‍ഗെ ആവശ്യപ്പെട്ടു.
