തിരുവനന്തപുരം: വീടുകളില്‍ നടത്തിയ പരിശോധനയില്‍ മകള്‍ വീണയുടെ ചുവന്ന ഡയറി ലഭിച്ചെന്ന ആരോപണം പ്രതിപക്ഷ നേതാവ് പിണറായി വിജയന്‍ നിഷേധിച്ചതിന് പിന്നാലെ, ഡയറിയുടെ സാന്നിധ്യം ശരിവെക്കുന്ന തെളിവുകള്‍ പുറത്ത്. റെഡ് ബുക്കിലെ ഒമ്പത് പേജുകളുടെ പകര്‍പ്പ് ഇ.ഡി സംസ്ഥാന പോലീസ് മേധാവിക്ക് സമര്‍പ്പിച്ച അന്വേഷണ റിപ്പോര്‍ട്ടില്‍ ഉള്‍പ്പെടുത്തിയിട്ടുണ്ട്. ഡയറിയില്‍ വീണയും സാക്ഷികളും ഒപ്പിട്ട് സ്ഥിരീകരിച്ചിട്ടുണ്ടെന്ന് രേഖകള്‍ വ്യക്തമാക്കുന്നു.
ഡയറിക്ക് പുറമെ വീണയുടെ ഭര്‍ത്താവും മുന്‍ മന്ത്രിയുമായ മുഹമ്മദ് റിയാസിന്റെ അടുത്ത അനുയായികള്‍ക്ക് പണം നല്‍കിയതിന്റെ വിശദാംശങ്ങള്‍ അടങ്ങിയ മറ്റ് ചില രേഖകളും ഇ.ഡി. കണ്ടെടുത്തു. ഫൈജാസ്, നിഖില്‍, വാരിസ്, ഷൈജല്‍ തുടങ്ങിയവരുടെ പേരുകളാണ് ഇതില്‍ പ്രധാനമായുമുള്ളത്. വിദേശ ബാങ്ക് അക്കൗണ്ട് വിവരങ്ങളും അറബ് എമിറേറ്റ്സ് ദിര്‍ഹത്തില്‍ (AED) നടത്തിയ വലിയ തുകയുടെ ഇടപാടുകളുമാണ് ഇതില്‍ രേഖപ്പെടുത്തിയിരിക്കുന്നത്. 2024 സെപ്റ്റംബര്‍ 17-ന് 2,82,600 ദിര്‍ഹത്തിന്റെ നിക്ഷേപം നടന്നതായി രേഖയിലുണ്ട്.
കേസില്‍ ആരോപണവിധേയനായ വാരിസിന്റെ ഫോണിലെ വാട്സാപ്പ് പരിശോധിച്ചതില്‍ നിരവധി ഫോണ്‍ നമ്പറുകള്‍ 'ഹവാല' എന്ന് കൂട്ടിച്ചേര്‍ത്താണ് സേവ് ചെയ്തിരിക്കുന്നത്. 'സുബൈര്‍ കൊടുവള്ളി ഹവാല' ഉള്‍പ്പെടെയുള്ള പേരുകള്‍ ഇതില്‍ കണ്ടെത്തി. കറന്‍സി നോട്ടുകളിലെ രഹസ്യ നമ്പറുകള്‍ വാട്സാപ്പ് വഴി കൈമാറിയത് ഹവാല ഇടപാടുകള്‍ക്കുള്ള കോഡുകളാണെന്നാണ് ഇ.ഡി.യുടെ കണ്ടെത്തല്‍. കേരളത്തില്‍ നിന്ന് സമാഹരിച്ച തുക വിദേശത്തേക്ക് കടത്തിയതായാണ് ഏജന്‍സിയുടെ ആരോപണം.
പി.എം.എല്‍.എ. (PMLA) നിയമപ്രകാരം കള്ളപ്പണ ഇടപാടുകളുമായി ബന്ധപ്പെട്ട പ്രാദേശിക കുറ്റകൃത്യങ്ങള്‍ സംസ്ഥാന പോലീസ് അന്വേഷിക്കേണ്ടതിനാലാണ് ഇ.ഡി. ഈ റിപ്പോര്‍ട്ടും അനുബന്ധ കോടതിവിധികളും ഡിജിപിക്ക് കൈമാറിയത്. റെഡ് ബുക്ക് ആരോപണം മാധ്യമസൃഷ്ടിയാണെന്ന പാര്‍ട്ടി അനുകൂലികളുടെ വാദങ്ങള്‍ തള്ളുന്നതാണ് പുതിയ വെളിപ്പെടുത്തലുകള്‍.
മാസപ്പടി കേസ്: ടി വീണയുടെ ഡയറി പുറത്ത്; ദുബായിലേക്ക് 85 ലക്ഷം അയച്ചെന്ന് ഇഡി; കുറിപ്പുകളില്‍ ഹവാല ഇടപാടിന് തെളിവ്
Jaihind TV News Report
Jaihind TV Web Desk
Updated Oct 11, 2026
2 min read
1,464 reads
