ആവേശം വിതറി ദീപക് ജോയിയുടെ റോഡ് ഷോ; കെ. ബാബുവിന്റെ പിൻഗാമിയായി സ്ഥാനാർത്ഥി; വികസനത്തുടർച്ചയ്ക്കായി യുഡിഎഫിന്റെ പടയോട്ടം

Jaihind TV Web Desk

March 20, 2026

1 min read • Updated: June 02, 2026

ആവേശം വിതറി ദീപക് ജോയിയുടെ റോഡ് ഷോ; കെ. ബാബുവിന്റെ പിൻഗാമിയായി സ്ഥാനാർത്ഥി; വികസനത്തുടർച്ചയ്ക്കായി യുഡിഎഫിന്റെ പടയോട്ടം

തൃപ്പൂണിത്തുറയുടെ വികസനത്തുടർച്ചയ്ക്കായി യുഡിഎഫ് സ്ഥാനാർത്ഥി ദീപക് ജോയിയുടെ തിരഞ്ഞെടുപ്പ് പ്രചാരണത്തിന് ഉജ്ജ്വല തുടക്കം. രാവിലെ തൃപ്പൂണിത്തുറ ശ്രീ പൂർണത്രയീശ ക്ഷേത്രത്തിൽ ദർശനം നടത്തി അനുഗ്രഹം തേടിയ ദീപക് ജോയിയെ മുൻ മന്ത്രിയും എംഎൽഎയുമായ കെ. ബാബുവിന്റെ നേതൃത്വത്തിൽ നേതാക്കളും പ്രവർത്തകരും ചേർന്ന് ഹൃദ്യമായി സ്വീകരിച്ചു. ദീപക് ജോയിയെ കെ. ബാബു എംഎൽഎ ഷാൾ അണിയിച്ച് റോഡ് ഷോയിലേക്ക് ആനയിച്ചു. തൃപ്പൂണിത്തുറയുടെ സമഗ്ര വികസനത്തിന് ദീപക് ജോയ് നിയമസഭയിൽ ഉണ്ടാകേണ്ടത് അനിവാര്യമാണെന്നും തന്നെ കൈപിടിച്ചു നടത്തിയ തൃപ്പൂണിത്തുറക്കാർ ദീപക്കിനെയും കൈവിടില്ലെന്നും കെ. ബാബു പറഞ്ഞു.

വൈകിട്ട് അഞ്ച് മണിയോടെ സിവിൽ സ്റ്റേഷൻ പരിസരത്ത് നിന്ന് ആരംഭിച്ച റോഡ് ഷോ ആവേശക്കടലായി മാറി. നൂറുകണക്കിന് പ്രവർത്തകർ ഇരുചക്ര വാഹനങ്ങളിലും വാദ്യമേളങ്ങളുടെ അകമ്പടിയോടെയും സ്ഥാനാർത്ഥിയെ അനുഗമിച്ചു. തൃപ്പൂണിത്തുറയുടെ പാരമ്പര്യവും വികസനവും കാത്തുസൂക്ഷിക്കുന്നതിനൊപ്പം എല്ലാ തലമുറയിലെയും ജനങ്ങൾ ആഗ്രഹിക്കുന്ന ഭരണപരവും സാമൂഹികവുമായ മാറ്റങ്ങൾ നടപ്പിലാക്കുമെന്ന് ദീപക് ജോയ് വോട്ടർമാർക്ക് ഉറപ്പ് നൽകി. ഇതുവരെ ജനങ്ങൾ നൽകിയ പിന്തുണ വരാനിരിക്കുന്ന നിയമസഭാ തിരഞ്ഞെടുപ്പിൽ വൻ വിജയമായി പ്രതിഫലിക്കുമെന്ന ആത്മവിശ്വാസവും അദ്ദേഹം പങ്കുവെച്ചു.