ബംഗാള്‍ ഉള്‍ക്കടലില്‍ രൂപംകൊണ്ട 'മുരസു' തീവ്ര ചുഴലിക്കാറ്റ് ആന്ധ്രാപ്രദേശ് തീരത്ത് കരതൊട്ടു. മണിക്കൂറില്‍ 110 കിലോമീറ്റര്‍ വരെ വേഗതയില്‍ വീശിയടിച്ചേക്കാവുന്ന അതിശക്തമായ കാറ്റിനും പ്രളയസമാനമായ മഴയ്ക്കും സാധ്യതയുള്ളതിനാല്‍ ആന്ധ്രാപ്രദേശ്, തമിഴ്നാട് സംസ്ഥാനങ്ങളില്‍ ജാഗ്രതാ നിര്‍ദ്ദേശം തുടരുകയാണ്. ചുഴലിക്കാറ്റിന്റെ പശ്ചാത്തലത്തില്‍ ആന്ധ്രയിലെ മൂന്ന് പ്രധാന വിമാനത്താവളങ്ങളില്‍ നിന്നുള്ള 19 ആഭ്യന്തര സര്‍വീസുകള്‍ പൂര്‍ണ്ണമായി റദ്ദാക്കി.
അതേസമയം, ചുഴലിക്കാറ്റിന്റെയും തെക്കന്‍ കേരളത്തിന് മുകളിലും അറബിക്കടലിലും നിലനില്‍ക്കുന്ന ചക്രവാതച്ചുഴികളുടെയും സ്വാധീനത്താല്‍ കേരളത്തിലും കേന്ദ്ര കാലാവസ്ഥാ വകുപ്പ് ശക്തമായ മഴ മുന്നറിയിപ്പ് നല്‍കിയിട്ടുണ്ട്. ഇന്ന് കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. നാളെ മലപ്പുറം ഉള്‍പ്പെടെയുള്ള വടക്കന്‍ ജില്ലകളിലും വെള്ളിയാഴ്ച സംസ്ഥാനത്തുടനീളവും ശക്തമായ മഴ തുടരുമെന്നാണ് പ്രവചനം.
ഒറ്റപ്പെട്ടയിടങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 30 മുതല്‍ 40 കിലോമീറ്റര്‍ വരെ വേഗതയുള്ള കാറ്റിനും സാധ്യതയുണ്ട്. 'മുരസു' കരതൊട്ട സാഹചര്യത്തില്‍ ഇന്നും നാളെയും ബംഗാള്‍ ഉള്‍ക്കടലില്‍ യാതൊരു കാരണവശാലും മത്സ്യബന്ധനത്തിന് പോകരുതെന്ന് കേന്ദ്ര കാലാവസ്ഥാ വകുപ്പ് കര്‍ശന മുന്നറിയിപ്പ് നല്‍കി.
'മുരസു' ചുഴലിക്കാറ്റ് കരതൊട്ടു: ആന്ധ്രയിലും തമിഴ്‌നാട്ടിലും റെഡ് അലർട്ട്, വിമാന സർവീസുകൾ റദ്ദാക്കി; കേരളത്തിലും കനത്ത മഴ മുന്നറിയിപ്പ്
Jaihind TV News Report
Jaihind TV Web Desk
2 min read
203 reads
