പാര്ട്ടി നേതാക്കളിലും പ്രവര്ത്തകരിലും വരുത്തേണ്ട മാറ്റങ്ങള് സംബന്ധിച്ച സമഗ്രമായ തിരുത്തല് രേഖ സി.പി.എം വിശാല ജില്ലാ കമ്മിറ്റികളില് അവതരിപ്പിക്കും. നേരത്തെ ചേര്ന്ന വിശാല സംസ്ഥാന കമ്മിറ്റിയിലെ ചര്ച്ചകള്ക്ക് പിന്നാലെ തയ്യാറാക്കിയ രേഖയ്ക്കൊപ്പം, അതത് ജില്ലകളിലെ സംഘടനാ-രാഷ്ട്രീയ സാഹചര്യങ്ങളും ഉള്പ്പെടുത്തി റിപ്പോര്ട്ടായി സമര്പ്പിക്കും.
പാര്ട്ടി ഘടകങ്ങള്ക്കുണ്ടായ വീഴ്ചകള്, നേതാക്കളുടെ പോരായ്മകള്, പ്രവര്ത്തന വൈകല്യങ്ങള് എന്നിവ പരിഹരിക്കുന്നതിന് ആവശ്യമായ തിരുത്തലുകള് വരുത്താനാണ് സംസ്ഥാന സെക്രട്ടേറിയറ്റ് തീരുമാനം. പൊളിറ്റ് ബ്യൂറോ അംഗങ്ങളുടെ നേതൃത്വത്തിലുള്ള പ്രത്യേക സംഘത്തെയാണ് ഓരോ ജില്ലയിലെയും യോഗങ്ങള്ക്കായി നിയോഗിച്ചിട്ടുള്ളത്. പ്രതിപക്ഷ നേതാവ് പിണറായി വിജയന്, എം.വി. ഗോവിന്ദന്, എ. വിജയരാഘവന് എന്നിവര് വിവിധ സംഘങ്ങള്ക്ക് നേതൃത്വം നല്കും. കേന്ദ്ര കമ്മിറ്റി അംഗങ്ങളും സെക്രട്ടേറിയറ്റ് അംഗങ്ങളും ഈ സംഘങ്ങളില് പങ്കാളികളാകും.
ജില്ലാ സെക്രട്ടറിമാര്ക്കെതിരെ വിമര്ശനം ഉയര്ന്ന തിരുവനന്തപുരം, കണ്ണൂര് ജില്ലകളില് ഒന്നിലധികം പി.ബി. അംഗങ്ങള് പങ്കെടുത്തേക്കും. എന്നാല് സെക്രട്ടറിമാരെ ഉടനടി മാറ്റേണ്ടതില്ലെന്നാണ് പാര്ട്ടിയിലെ പൊതു ധാരണ. വിശാല യോഗത്തിലെ പൊതുവികാരം കണക്കിലെടുത്താകും പുനഃസംഘടന ഉള്പ്പെടെയുള്ള കാര്യങ്ങളില് ആത്യന്തിക തീരുമാനമെടുക്കുക. വര്ഗ ബഹുജന സംഘടനാ ഭാരവാഹികളെക്കൂടി യോഗത്തില് പങ്കെടുപ്പിക്കും. സെപ്റ്റംബര് 26-ന് ആലപ്പുഴയില് ആരംഭിക്കുന്ന വിശാല ജില്ലാ കമ്മിറ്റി യോഗങ്ങള് ഒക്ടോബര് 19-ന് കണ്ണൂരിലാണ് അവസാനിക്കുന്നത്.
