ജനസംഖ്യാപരമായ മാറ്റങ്ങൾ പഠിക്കുന്നതിനായി കേന്ദ്ര ആഭ്യന്തര മന്ത്രാലയം രൂപീകരിച്ച ഉന്നതതല സമിതി മതം തിരിച്ചുള്ള വിവരങ്ങൾ ശേഖരിക്കുന്നതിനെതിരെ കോൺഗ്രസ് രൂക്ഷവിമർശനം ഉന്നയിച്ചു. കഴിഞ്ഞ 15 വർഷത്തെ ജനങ്ങൾ, സ്‌കൂൾ പ്രവേശനം, വാഹന രജിസ്‌ട്രേഷൻ, സ്വത്ത് ഇടപാടുകൾ എന്നിവയുടെ മതം തിരിച്ചുള്ള വിവരങ്ങൾ സമിതി ആവശ്യപ്പെട്ടതായുള്ള 'ദി ഹിന്ദു' പത്രത്തിന്റെ റിപ്പോർട്ട് പങ്കുവെച്ചുകൊണ്ടാണ് കോൺഗ്രസ് ജനറൽ സെക്രട്ടറി ജയ്റാം രമേശ് കേന്ദ്ര സർക്കാരിനെതിരെ രംഗത്തെത്തിയത്. സമിതിയുടേത് "ദുരൂഹമായ അജണ്ട"യാണെന്നും മുൻധാരണകളോടെയാണ് ചോദ്യങ്ങൾ തയ്യാറാക്കിയിരിക്കുന്നതെന്നും മുൻകൂട്ടി തയ്യാറാക്കിയ നിഗമനങ്ങളിലേക്കാണ് സമിതി നീങ്ങുന്നതെന്നും അദ്ദേഹം ആരോപിച്ചു.
റിപ്പോർട്ടുകൾ പ്രകാരം, ജില്ലാടിസ്ഥാനത്തിലുള്ള ആരാധനാലയങ്ങളുടെ വിവരങ്ങൾ, ആധാർ, വോട്ടർ ഐ.ഡി, റേഷൻ കാർഡ് എന്നിവയിലെ അസാധാരണമായ വർദ്ധനവ് സംബന്ധിച്ച വിവരങ്ങൾ എന്നിവയും സമിതി ആവശ്യപ്പെട്ടിട്ടുണ്ട്. കൂടാതെ, പട്ടികവർഗ്ഗ വിഭാഗങ്ങൾക്കിടയിലെ മതപരിവർത്തനം സംബന്ധിച്ച ഇന്റലിജൻസ് വിലയിരുത്തലുകൾ, കമ്മീഷൻ റിപ്പോർട്ടുകൾ, പ്രവർത്തനസജ്ജമായ തടങ്കൽ കേന്ദ്രങ്ങളുടെ വിവരങ്ങൾ എന്നിവയും സമിതി തേടിയതായാണ് റിപ്പോർട്ട്.
എന്നാൽ, സർക്കാർ വകുപ്പുകൾ സാധാരണയായി മതം തിരിച്ചുള്ള വിവരങ്ങൾ ഇത്തരത്തിൽ സൂക്ഷിക്കാത്തതിനാൽ സമിതിയുടെ പല ചോദ്യങ്ങൾക്കും മറുപടി നൽകാൻ സംസ്ഥാന സർക്കാരുകൾക്ക് കഴിയുന്നില്ലെന്ന് റിപ്പോർട്ടിൽ വ്യക്തമാക്കുന്നു. സമിതിയുടെ ഇത്തരം ആവശ്യങ്ങളാണ് കോൺഗ്രസിന്റെ വിമർശനത്തിന് പ്രധാന കാരണമായി മാറിയത്. അതേസമയം, ഈ ഉന്നതതല സമിതിയുടെ കണ്ടെത്തലുകൾ ഇതുവരെ ഔദ്യോഗികമായി പുറത്തുവിട്ടിട്ടില്ല.
