തിരുവനന്തപുരം: സംസ്ഥാനത്തെ തൊഴിലാളികളെ ബാധിക്കാത്ത തരത്തിലും അവരുടെ അവകാശങ്ങൾ പൂർണ്ണമായി സംരക്ഷിച്ചുകൊണ്ടുമാകും ലേബർ കോഡ് നടപ്പിലാക്കുകയെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. തിരുവനന്തപുരത്ത് സംഘടിപ്പിച്ച ഐ.എൻ.ടി.യു.സി സംസ്ഥാന നേതൃത്വയോഗം ഉദ്ഘാടനം ചെയ്ത് സംസാരിക്കവേയാണ് സർക്കാരിന്റെ നയം അദ്ദേഹം വ്യക്തമാക്കിയത്. തൊഴിലാളികളെ വേദനിപ്പിക്കുന്ന രീതിയിലുള്ള ഒരു നടപടിയും സർക്കാരിന്റെ ഭാഗത്തുനിന്നും ഉണ്ടാകില്ലെന്ന് അദ്ദേഹം ഉറപ്പുനൽകി.
സങ്കീർണ്ണത ഒഴിവാക്കാൻ തീരുമാനം കേന്ദ്ര പാർലമെന്റ് പാസാക്കിയ നിയമമായതിനാൽ ലേബർ കോഡ് നടപ്പിലാക്കാതിരിക്കാൻ കഴിയില്ലെന്ന യാഥാർത്ഥ്യം മുഖ്യമന്ത്രി ചൂണ്ടിക്കാട്ടി. നിലവിൽ പഴയ നിയമവും പുതിയ ലേബർ കോഡും പൂർണ്ണമായി നിലവിലില്ലാത്ത സാഹചര്യം കേരളത്തിലെ തൊഴിൽ മേഖലയെ പ്രതികൂലമായി ബാധിക്കും. ഈ പ്രതിസന്ധി പരിഹരിക്കാനാണ് സംസ്ഥാനത്ത് തൊഴിലാളി സൗഹൃദമായി ലേബർ കോഡ് നടപ്പിലാക്കാൻ സർക്കാർ തീരുമാനിച്ചതെന്ന് അദ്ദേഹം വിശദീകരിച്ചു.
സംഘടനകളുമായി ചർച്ച തുടരുന്നു എല്ലാ തൊഴിലാളി സംഘടനകളുമായും വിഷയം വിശദമായി കൂടിയാലോചിക്കുമെന്ന് മുഖ്യമന്ത്രി അറിയിച്ചു. ആരുടെയും താൽപര്യങ്ങൾക്ക് വിരുദ്ധമായി സർക്കാർ തീരുമാനങ്ങൾ കൈക്കൊള്ളില്ല. നിലവിൽ വിവിധ തൊഴിലാളി സംഘടനകളുമായി ചർച്ചകൾ ആരംഭിച്ചിട്ടുണ്ടെന്നും എല്ലാ പ്രസ്ഥാനങ്ങളെയും പൂർണ്ണമായി വിശ്വാസത്തിലെടുത്തുകൊണ്ട് മാത്രമേ തുടർന്നുള്ള നടപടികളുമായി മുന്നോട്ടുപോകൂ എന്നും അദ്ദേഹം കൂട്ടിച്ചേർത്തു.
