ഇലക്ട്രിക് വാഹനങ്ങളുടെ പ്രധാന തിരിച്ചടിയായ ഉയർന്ന വാങ്ങൽ ചെലവ് കുറയ്ക്കാൻ സഹായിക്കുന്ന ബാറ്ററി-ആസ്-എ-സർവീസ് സംവിധാനം ഇന്ത്യൻ വിപണിയിൽ ശ്രദ്ധ നേടുന്നു. വാഹനത്തിന്റെ മുഴുവൻ തുകയും ഒരുമിച്ച് നൽകുന്നതിന് പകരം, ബാറ്ററിയുടെ വില ഒഴിവാക്കി വാഹന ബോഡി കുറഞ്ഞ വിലയ്ക്ക് വാങ്ങാനും പിന്നീട് ഉപയോഗിക്കുന്ന ദൂരത്തിനനുസരിച്ച് ബാറ്ററിക്ക് സബ്‌സ്‌ക്രിപ്‌ഷൻ തുക നൽകാനും ഇതിലൂടെ സാധിക്കും. ഹാച്ച്ബാക്ക് മുതൽ എസ്‌യുവി വരെയുള്ള പ്രമുഖ മോഡലുകളിൽ ഈ സൗകര്യം ലഭ്യമാണ്.
1. കിയ സിറോസ് ഇവി (Kia Syros EV)
പ്രാരംഭ വില: ₹7.99 ലക്ഷം മുതൽ (സാധാരണ വില: ₹13.49 ലക്ഷം – ₹19.99 ലക്ഷം)
ബാറ്ററി സബ്‌സ്‌ക്രിപ്‌ഷൻ: കിലോമീറ്ററിന് ₹3.30 കിയയുടെ ഏറ്റവും പുതിയ ഇലക്ട്രിക് എസ്‌യുവിയായ സിറോസ് ഇവി BaaS പദ്ധതി വഴി 7.99 ലക്ഷം രൂപ മുതൽ സ്വന്തമാക്കാം. 42kWh, 51.4kWh എന്നീ ബാറ്ററി പാക്ക് ഓപ്ഷനുകളിൽ എത്തുന്ന ഈ വാഹനത്തിന് 526 കിലോമീറ്റർ വരെ റേഞ്ച് ലഭിക്കും. പരിധിയില്ലാത്ത കിലോമീറ്റർ ഉപയോഗവും 15 വർഷത്തെ ഹൈ-വോൾട്ടേജ് ബാറ്ററി വാറണ്ടിയും കമ്പനി വാഗ്ദാനം ചെയ്യുന്നു.
2. എംജി കോമറ്റ് ഇവി (MG Comet EV)
പ്രാരംഭ വില: ₹4.92 ലക്ഷം മുതൽ (സാധാരണ വില: ₹7.63 ലക്ഷം)
ബാറ്ററി സബ്‌സ്‌ക്രിപ്‌ഷൻ: കിലോമീറ്ററിന് ₹3.20 ഇന്ത്യയിൽ ലഭ്യമായ ഏറ്റവും ചെലവുകുറഞ്ഞ ഇലക്ട്രിക് കാറുകളിലൊന്നായ എംജി കോമറ്റ് ഇവി BaaS വഴിയാണെങ്കിൽ ₹5 ലക്ഷത്തിൽ താഴെ പ്രാരംഭ വിലയിൽ സ്വന്തമാക്കാം. സിറ്റി യാത്രകൾക്ക് അനുയോജ്യമായ ഈ കുഞ്ഞൻ കാറിന്റെ ബാറ്ററി വാടക നിരക്ക് കിലോമീറ്ററിന് ₹3.20 ആണ്.
3. ടാറ്റ പഞ്ച്.ഇവി (Tata Punch.ev)
പ്രാരംഭ വില: ₹6.49 ലക്ഷം മുതൽ (സാധാരണ വില: ₹9.69 ലക്ഷം)
ബാറ്ററി സബ്‌സ്‌ക്രിപ്‌ഷൻ: കിലോമീറ്ററിന് ₹2.60 ടാറ്റയുടെ ജനപ്രിയ എസ്‌യുവിയായ പഞ്ച്.ഇവിയുടെ 30kWh ബാറ്ററി പാക്കുള്ള സ്മാർട്ട് വേരിയന്റിൽ BaaS സൗകര്യം ലഭ്യമാണ്. ബാറ്ററി വാടക കിലോമീറ്ററിന് ₹2.60 മാത്രം നൽകിയാൽ മതിയാകും. ഇതിലൂടെ ആദ്യ വാങ്ങൽ ചെലവിൽ ഏകദേശം 3.2 ലക്ഷം രൂപ വരെ ഉപഭോക്താക്കൾക്ക് ലാഭിക്കാം.
4. ടാറ്റ ടിയാഗോ.ഇവി (Tata Tiago.ev)
പ്രാരംഭ വില: ₹4.69 ലക്ഷം മുതൽ (സാധാരണ വില: ₹6.99 ലക്ഷം)
ബാറ്ററി സബ്‌സ്‌ക്രിപ്‌ഷൻ: കിലോമീറ്ററിന് ₹2.60 ടാറ്റയുടെ ജനപ്രിയ ഹാച്ച്ബാക്ക് ആയ ടിയാഗോ.ഇവി ഫെയ്‌സ്‌ലിഫ്റ്റിലും BaaS ഓപ്ഷൻ ലഭ്യമാക്കിയിട്ടുണ്ട്. ബാറ്ററി സബ്‌സ്‌ക്രിപ്‌ഷൻ തെരഞ്ഞെടുക്കുന്നതിലൂടെ പ്രാരംഭ ഉടമസ്ഥാവകാശ ചെലവിൽ ഏകദേശം 2.3 ലക്ഷം രൂപയുടെ ലാഭം സ്വന്തമാക്കാം.
5. മാരുതി സുസുക്കി ഇ വിറ്റാര (Maruti Suzuki e Vitara)
പ്രാരംഭ വില: ₹10.99 ലക്ഷം മുതൽ (സാധാരണ വില: ₹15.99 ലക്ഷം)
ബാറ്ററി സബ്‌സ്‌ക്രിപ്‌ഷൻ: കിലോമീറ്ററിന് ₹3.99 – ₹4.39 മാരുതി സുസുക്കിയുടെ ആദ്യ ഇലക്ട്രിക് എസ്‌യുവിയായ ഇ വിറ്റാരയും ബാസ് മാതൃകയിലാണ് എത്തുന്നത്. അടിസ്ഥാന ഡെൽറ്റ വേരിയന്റിൽ അഞ്ച് ലക്ഷം രൂപ വരെയും ഉയർന്ന സെറ്റ, ആൽഫ വേരിയന്റുകളിൽ 5.5 ലക്ഷം രൂപ വരെയും പ്രാരംഭ വിലയിൽ ലാഭിക്കാം.
ഭാവിയിലേക്ക് വഴിതുറക്കുന്ന സാങ്കേതികമാറ്റം
ഇലക്ട്രിക് കാറുകളുടെ ആകമാന തുകയുടെ വലിയൊരു ഭാഗം വീതിക്കുന്നത് അതിലെ ബാറ്ററിയാണ്. ബാറ്ററി-ആസ്-എ-സർവീസ് (BaaS) സംവിധാനത്തിലൂടെ ആ തുക വേർതിരിക്കപ്പെടുന്നതോടെ കുറഞ്ഞ ബജറ്റിലും ഉപഭോക്താക്കൾക്ക് മികച്ച റേഞ്ചുള്ള ഇവി കാറുകൾ വാങ്ങാൻ സാധിക്കുന്നു. കൂടുതൽ നിർമാതാക്കൾ ഈ മാതൃക പിന്തുടരുന്നതോടെ ഇന്ത്യയിൽ ഇലക്ട്രിക് വാഹന വിപ്ലവത്തിന് വേഗം കൂടുമെന്ന് ഉറപ്പാണ്.
