അസമിൽ വാഹനാപകടം: കാസിരംഗയിൽ ട്രക്കും ട്രാവലറും കൂട്ടിയിടിച്ച് 23 മരണം; കൊല്ലപ്പെട്ടവരിൽ ഭൂരിഭാഗവും വിദ്യാർത്ഥികൾ

ഗുവാഹത്തി: അസമിലെ കാസിരംഗയിൽ ട്രക്കും ട്രാവലറും കൂട്ടിയിടിച്ചുണ്ടായ ദാരുണാപകടത്തിൽ 23 പേർ മരിച്ചു. ഏഴ് പേർക്ക് ഗുരുതരമായി പരിക്കേറ്റു. പരിക്കേറ്റവരിൽ പലരുടെയും ആരോഗ്യനില അതീവ ഗുരുതരമായി തുടരുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്നാണ് റിപ്പോർട്ടുകൾ.

ബൊക്കാഖട്ടിൽ നിന്ന് നാഗോണിലേക്ക് പോവുകയായിരുന്ന ട്രാവലർ എതിരെ വന്ന ട്രക്കിലേക്ക് ഇടിച്ചുകയറിയാണ് അപകടമുണ്ടായത്. കൂട്ടിയിടിയുടെ ആഘാതത്തിൽ ട്രാവലർ പൂർണ്ണമായും തകരുകയും യാത്രക്കാർ വാഹനത്തിനുള്ളിൽ കുടുങ്ങുകയും ചെയ്തു. ഉടൻതന്നെ സ്ഥലത്തെത്തിയ പോലീസും നാട്ടുകാരും ചേർന്ന് തകർന്ന വാഹനം വെട്ടിപ്പൊളിച്ചാണ് ഉള്ളിൽ കുടുങ്ങിയവരെ പുറത്തെടുത്തത്.

പരിക്കേറ്റവരെ വിദഗ്ധ ചികിത്സയ്ക്കായി കൊഹോറ മോഡൽ ആശുപത്രിയിൽ പ്രവേശിപ്പിച്ചു. ട്രാവലറിന്റെ അമിതവേഗതയാണ് അപകടത്തിന് കാരണമായതെന്നാണ് പ്രാഥമിക നിഗമനം. അപകടത്തിൽപ്പെട്ട ട്രാവലറിലുണ്ടായിരുന്നവരിൽ ഭൂരിഭാഗവും വിദ്യാർത്ഥികളാണ്. സംഭവത്തിൽ അസം സർക്കാർ ഉന്നതതല അന്വേഷണം പ്രഖ്യാപിച്ചു. അപകടത്തിൽ അസം മുഖ്യമന്ത്രി ഹിമന്ത ബിശ്വശർമ അതീവ ദുഃഖം രേഖപ്പെടുത്തി.