'അർണബ്' അതിതീവ്ര ചുഴലിക്കാറ്റായി കരയിലേക്ക്; ആന്ധ്രയിലും ഒഡിഷയിലും അതീവ ജാഗ്രത, പതിനായിരങ്ങളെ ഒഴിപ്പിച്ചു

അർണബ്' ചുഴലിക്കാറ്റ് അതിതീവ്ര രൂപം പ്രാപിച്ച് തീരത്തേക്ക് അടുക്കുന്നതോടെ ആന്ധ്രാപ്രദേശിലും ഒഡിഷയിലും അതീവ ജാഗ്രതാ നിർദ്ദേശം പുറപ്പെടുവിച്ചു. നിലവിൽ ആന്ധ്രാ തീരത്ത് നിന്ന് 300 കിലോമീറ്റർ അകലെ സ്ഥിതി ചെയ്യുന്ന കാറ്റ്, മണിക്കൂറിൽ 25 കിലോമീറ്റർ വേഗതയിലാണ് കരയിലേക്ക് നീങ്ങുന്നത്. കാറ്റിന്റെ സ്വാധീനത്താൽ ആന്ധ്രാ തീരത്ത് കടൽ പ്രക്ഷുബ്ധമാകുകയും വിശാഖപട്ടണത്ത് ശക്തമായ കാറ്റ് വീശിയടിക്കുകയും ചെയ്യുന്നുണ്ട്. അയൽ സംസ്ഥാനമായ ഒഡിഷയിലും കനത്ത മഴ തുടരുകയാണ്.

നാളെ ഉച്ചയ്ക്ക് 12 മണിക്ക് മുൻപായി അർണബ് കരതൊടുമെന്നാണ് കാലാവസ്ഥാ പ്രവചനം. ആന്ധ്രയിലെ യാനത്തിനും കാക്കിനടയ്ക്കും ഇടയിലുള്ള മേഖലയിലൂടെയാകും കാറ്റ് കരയിലേക്ക് പ്രവേശിക്കുക. കരതൊടുമ്പോൾ മണിക്കൂറിൽ 115 മുതൽ 125 കിലോമീറ്റർ വരെ വേഗത പ്രതീക്ഷിക്കുന്നുണ്ടെങ്കിലും, കരയിൽ പ്രവേശിച്ച ശേഷം കാറ്റിന്റെ വേഗത മണിക്കൂറിൽ 140 കിലോമീറ്റർ വരെ ഉയർന്നേക്കാമെന്ന് മുന്നറിയിപ്പുണ്ട്.

സാധ്യമായ ദുരന്തങ്ങൾ ഒഴിവാക്കാൻ വലിയ സുരക്ഷാ സന്നാഹങ്ങളാണ് ആന്ധ്രയിലും ഒഡിഷയിലും ഒരുക്കിയിട്ടുള്ളത്. കാക്കിനട തീരത്തുനിന്ന് മാത്രം 89,000 പേരെ ദുരിതാശ്വാസ ക്യാമ്പുകളിലേക്ക് മാറ്റി. ഹോപ് ഐലൻഡ് പൂർണമായും ഒഴിപ്പിച്ചു. ഇരു സംസ്ഥാനങ്ങളിലുമായി 1400-ലേറെ ദുരിതാശ്വാസ ക്യാമ്പുകൾ സജ്ജമാക്കിയിട്ടുണ്ട്. നാലായിരത്തിലധികം ഗർഭിണികളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു. കടലിൽ പോയ മുഴുവൻ മീൻപിടിത്ത ബോട്ടുകളും സുരക്ഷിതമായി തീരത്ത് അടുപ്പിച്ചു.

1970-ന് ശേഷം 11 അതിതീവ്ര ചുഴലിക്കാറ്റുകൾ ഉൾപ്പെടെ 61 കാറ്റുകളെ നേരിട്ട അനുഭവസമ്പത്തുമായാണ് ആന്ധ്രാപ്രദേശ് ഇത്തവണത്തെ പ്രതിരോധ നടപടികൾ ഏകോപിപ്പിക്കുന്നത്. സുരക്ഷ മുൻനിർത്തി ഇരു സംസ്ഥാനങ്ങളിലെയും സ്കൂളുകൾക്ക് ഇതിനകം അവധി പ്രഖ്യാപിച്ചിട്ടുണ്ട്. മുൻകരുതലിന്റെ ഭാഗമായി റെയിൽവേ 53 ട്രെയിനുകൾ റദ്ദാക്കി. അർണബിന്റെ പശ്ചാത്തലത്തിൽ വിശാഖപട്ടണം, വിജയവാഡ എന്നിവിടങ്ങളിൽ നിന്നുള്ള വിമാന സർവീസുകളെ ബാധിച്ചേക്കാമെന്ന് എയർ ഇന്ത്യയും അറിയിച്ചിട്ടുണ്ട്.