തിരുവനന്തപുരം: ആലപ്പുഴ 'രക്ഷാപ്രവര്‍ത്തന' കേസ് അട്ടിമറിച്ചെന്ന പരാതിയില്‍ എ.ഡി.ജി.പി എം.ആര്‍. അജിത് കുമാര്‍ ഡി.ജി.പിക്ക് വിശദീകരണം നല്‍കി. പ്രത്യേകാന്വേഷണ സംഘത്തിന്റെ റിപ്പോര്‍ട്ടിന്റെ അടിസ്ഥാനത്തില്‍ ഈ മാസം 16-നാണ് ഡി.ജി.പി അജിത് കുമാറിനോട് വിശദീകരണം തേടിയത്. റിപ്പോര്‍ട്ട് ഡി.ജി.പി ഇന്ന് സര്‍ക്കാരിന് കൈമാറും.
ഡി.ജി.പി സ്ഥാനക്കയറ്റത്തിനായുള്ള സ്‌ക്രീനിംഗ് കമ്മിറ്റി യോഗം ചേരാനിരിക്കെ, എ.ഡി.ജി.പിയുടെ വിശദീകരണവും അതിന്മേലുള്ള സര്‍ക്കാരിന്റെ തീരുമാനവും അതീവ നിര്‍ണായകമാണ്. കേസ് ഡയറി തിരുത്തിയതിലും കേസ് അന്വേഷണം അട്ടിമറിച്ചതിലും എ.ഡി.ജി.പി എം.ആര്‍. അജിത് കുമാറിന്റെ പങ്ക് കൂടുതല്‍ വ്യക്തമാക്കുന്ന പുതുക്കിയ റിപ്പോര്‍ട്ടാണ് എസ്.ഐ.ടി കഴിഞ്ഞ ദിവസം സമര്‍പ്പിച്ചത്. മുഖ്യമന്ത്രിയുടെ ഗണ്‍മാനെ രക്ഷിക്കാനായി കേസ് ഡയറി തിരുത്തിയ സമയത്ത് അജിത് കുമാര്‍ ഓഫീസിലുണ്ടായിരുന്നില്ല എന്ന വാദത്തിലടക്കം സംശയങ്ങള്‍ നിലനില്‍ക്കുന്നുണ്ട്. തിരുവനന്തപുരത്ത് മടങ്ങിയെത്തിയ ശേഷം ജൂലൈ 21-ന് മറുപടി നല്‍കാം എന്ന് അറിയിച്ചതനുസരിച്ചാണ് എ.ഡി.ജി.പി ഡി.ജി.പിക്ക് രേഖാമൂലം വിശദീകരണം കൈമാറിയത്.
'രക്ഷാപ്രവര്‍ത്തന' കേസ് അട്ടിമറി: ഡി.ജി.പിക്ക് വിശദീകരണം നല്‍കി എം.ആര്‍. അജിത് കുമാര്‍; റിപ്പോര്‍ട്ട് ഇന്ന് സര്‍ക്കാരിന്
Jaihind TV News Report
Jaihind TV Web Desk
Updated Oct 12, 2026
2 min read
357 reads
