കൊച്ചി: കേരളത്തിൽ എയിംസ് സ്ഥാപിക്കുന്നതിൽ നിലവിൽ മുൻഗണനയില്ലെന്ന കേന്ദ്ര സർക്കാർ നിലപാടിനെതിരെ ഹൈക്കോടതിയുടെ രൂക്ഷവിമർശനം. ആരോഗ്യരംഗത്ത് മുന്നിൽ നിൽക്കുന്നത് കേരളത്തിന് എയിംസ് ലഭിക്കുന്നതിനുള്ള അയോഗ്യതയാണോയെന്ന് ചീഫ് ജസ്റ്റിസ് അധ്യക്ഷനായ ഡിവിഷൻ ബെഞ്ച് ചോദിച്ചു. കേരളം ഒരു എയിംസ് അർഹിക്കുന്നുണ്ടെന്നും കോടതി വ്യക്തമാക്കി.
ആരോഗ്യരംഗത്ത് പിന്നാക്കം നിൽക്കുന്ന സംസ്ഥാനങ്ങളിലാണ് ആദ്യം എയിംസ് സ്ഥാപിക്കുകയെന്നും കൂടുതൽ അടിസ്ഥാന സൗകര്യങ്ങളും ചികിത്സാ സംവിധാനങ്ങളും ആവശ്യമായ ഇടങ്ങൾക്കാണ് മുൻഗണനയെന്നുമാണ് കേന്ദ്ര സർക്കാർ കോടതിയെ അറിയിച്ചത്. ഇതിന്റെ അടിസ്ഥാനത്തിലാണ് കേരളത്തെ നിലവിലെ മുൻഗണനാ പട്ടികയിൽ നിന്ന് ഒഴിവാക്കിയതെന്നും കേന്ദ്രം വ്യക്തമാക്കി.
കേന്ദ്ര മന്ത്രി സുരേഷ് ഗോപി അടക്കം വലിയ അവകാശവാദങ്ങൾ ഉന്നയിക്കുന്നതിനിടെയാണ് കേന്ദ്രത്തിന്റെ ഈ പ്രതികരണം എത്തിയിരിക്കുന്നത്. എല്ലാവർക്കും മുൻനിര സ്വകാര്യ ആശുപത്രികളിൽ ചികിത്സ തേടാൻ കഴിയില്ലെന്ന് ചൂണ്ടിക്കാട്ടിയ കോടതി, ജനസാന്ദ്രത കൂടിയ കേരളത്തിന് മികച്ച പൊതുജനാരോഗ്യ സംവിധാനങ്ങൾ അനിവാര്യമാണെന്നും ഓർമ്മിപ്പിച്ചു. സംസ്ഥാനത്തെ ആരോഗ്യരംഗത്തെ നേട്ടങ്ങൾ ചൂണ്ടിക്കാട്ടി എയിംസ് നിഷേധിക്കുന്ന കേന്ദ്ര നിലപാട് വരും ദിവസങ്ങളിൽ വലിയ രാഷ്ട്രീയ ചർച്ചകൾക്ക് വഴിവെക്കും.
