വിസ്മയയുടെ വരവ് ഗംഭീരം; 'തുടക്കം' ആദ്യ ഷോയുടെ പോസിറ്റീവ് റിപ്പോർട്ടുകൾക്ക് പിന്നാലെ ടിക്കറ്റ് ബുക്കിംഗിൽ കുതിപ്പ്

വിസ്മയ മോഹൻലാലിന്റെ അഭിനയ അരങ്ങേറ്റ ചിത്രം എന്ന നിലയിൽ റിലീസിന് മുമ്പ് തന്നെ വലിയ ശ്രദ്ധ നേടിയ ചിത്രമായിരുന്നു ‘തുടക്കം’. മോഹൻലാലിന്റെ അതിഥിവേഷം കൂടി ചിത്രത്തിലുണ്ടെന്ന വാർത്ത പുറത്തുവന്നതോടെ സിനിമാപ്രേമികൾക്കിടയിൽ ചിത്രത്തിനായുള്ള പ്രതീക്ഷകൾ ഉയർന്നിരുന്നു.

റിലീസ് ദിനത്തിലെ ആദ്യ ഷോകൾക്ക് പിന്നാലെ പുറത്തുവന്ന പ്രേക്ഷക പ്രതികരണങ്ങൾ പോസിറ്റീവായതോടെ ചിത്രത്തിന് ബോക്സ് ഓഫീസിൽ മികച്ച തുടക്കമാണ് ലഭിക്കുന്നത്. പ്രമുഖ ടിക്കറ്റ് ബുക്കിംഗ് പ്ലാറ്റ്‌ഫോമായ ബുക്ക് മൈ ഷോയിൽ ചിത്രത്തിന്റെ ടിക്കറ്റ് വിൽപ്പനയിൽ വലിയ കുതിപ്പാണ് ഇപ്പോൾ രേഖപ്പെടുത്തുന്നത്. മണിക്കൂറിൽ 8600-ലധികം ടിക്കറ്റുകളാണ് ചിത്രം വിറ്റഴിക്കുന്നത്.

ആദ്യ പ്രദർശനങ്ങൾക്ക് മുമ്പ് തന്നെ ബുക്ക് മൈ ഷോ ട്രെൻഡിംഗിൽ ഇടം നേടിയിരുന്ന ‘തുടക്കം’, ആദ്യ ഷോകൾക്ക് ശേഷമുള്ള മികച്ച പ്രതികരണങ്ങളോടെയാണ് കൂടുതൽ ജനശ്രദ്ധ നേടിയത്.

ട്രാക്കർമാരുടെ കണക്കുകൾ പ്രകാരം, അഡ്വാൻസ് ബുക്കിംഗിലൂടെ കേരളത്തിൽ നിന്ന് ചിത്രം നേടിയത് ഏകദേശം 86 ലക്ഷം രൂപയാണ്. കർണാടകത്തിൽ നിന്ന് 8 ലക്ഷം രൂപയും തമിഴ്നാട്ടിൽ നിന്ന് 3 ലക്ഷം രൂപയും ഇന്ത്യയിലെ മറ്റ് സംസ്ഥാനങ്ങളിൽ നിന്ന് 2.50 ലക്ഷം രൂപയും ചിത്രം സ്വന്തമാക്കി.

ഇന്ത്യൻ വിപണിയിൽ നിന്നുള്ള ആകെ അഡ്വാൻസ് ബുക്കിംഗ് നേട്ടം 99.50 ലക്ഷം രൂപയാണെന്നാണ് റിപ്പോർട്ടുകൾ. വിദേശ മാർക്കറ്റുകളിൽ നിന്ന് 40 ലക്ഷം രൂപ കൂടി ലഭിച്ചതോടെ ചിത്രത്തിന്റെ ആഗോള അഡ്വാൻസ് ബുക്കിംഗ് നേട്ടം ഏകദേശം 1.40 കോടി രൂപയിലെത്തി.

പുതുമുഖ താരം പ്രധാന കഥാപാത്രത്തെ അവതരിപ്പിക്കുന്ന ചിത്രമെന്ന നിലയിൽ ഇത് മികച്ച തുടക്കമായാണ് വിലയിരുത്തപ്പെടുന്നത്. ആദ്യ ഷോകൾക്ക് പിന്നാലെ ലഭിച്ച അനുകൂല പ്രതികരണങ്ങൾ വാരാന്ത്യ കളക്ഷനിലും വലിയ സ്വാധീനം ചെലുത്തുമെന്നാണ് വിലയിരുത്തൽ.

ജൂഡ് ആന്തണി ജോസഫ് സംവിധാനം ചെയ്യുന്ന ചിത്രം നിർമ്മിച്ചിരിക്കുന്നത് ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ്. ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്.

മോഹൻലാൽ നായകനായ ‘എമ്പുരാൻ’ എന്ന ചിത്രത്തിലൂടെ അഭിനയരംഗത്ത് അരങ്ങേറ്റം കുറിച്ച ആശിഷ് ജോ ആന്റണി, ‘തുടക്കം’ എന്ന ചിത്രത്തിലൂടെ കൂടുതൽ ശ്രദ്ധേയമായ വേഷവുമായി എത്തുകയാണ്. എമ്പുരാനിലെ ചെറിയ വേഷത്തിലൂടെ തന്നെ പ്രേക്ഷകരുടെ ശ്രദ്ധ നേടിയിരുന്ന താരം, പുതിയ ചിത്രത്തിലൂടെ മുഖ്യധാരാ സിനിമയിൽ സജീവമാകാനുള്ള ഒരുക്കത്തിലാണ്.

ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്തണി ജോസഫ് എന്നിവർ ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ജേക്സ് ബിജോയ് ആണ് സംഗീത സംവിധാനം നിർവഹിച്ചിരിക്കുന്നത്. ജോമോൻ ടി ജോൺ ഛായാഗ്രഹണവും ചമൻ ചാക്കോ എഡിറ്റിംഗും കൈകാര്യം ചെയ്യുന്നു.