കേരളം വെന്തുരുകുന്നു! 12 ജില്ലകളിൽ യെല്ലോ അലർട്ട്;ഈ ജില്ലകളിൽ പുറത്തിറങ്ങരുത്!
സംസ്ഥാനത്ത് വരും ദിവസങ്ങളിലും താപനില ഉയരുമെന്ന് കേന്ദ്ര കാലാവസ്ഥാ വകുപ്പിന്റെയും ദുരന്തനിവാരണ അതോറിറ്റിയുടെയും മുന്നറിയിപ്പ്. ചൂടിനൊപ്പം മാരകമായ അൾട്രാവയലറ്റ് വികിരണവും (UV Radiation) സംസ്ഥാനത്തിന്റെ വിവിധ ഭാഗങ്ങളിൽ രേഖപ്പെടുത്തിയിട്ടുണ്ട്. ഇടുക്കിയും വയനാടും ഒഴികെയുള്ള 12 ജില്ലകളിൽ യെല്ലോ അലർട്ട് പ്രഖ്യാപിച്ചു.
പാലക്കാട്, തൃശൂർ, കണ്ണൂർ ജില്ലകളിൽ താപനില 38 ഡിഗ്രി സെൽഷ്യസ് വരെ ഉയർന്നേക്കാം. കോഴിക്കോട്, മലപ്പുറം, കോട്ടയം ജില്ലകളിൽ 37 ഡിഗ്രിയും തിരുവനന്തപുരം അടക്കമുള്ള തെക്കൻ ജില്ലകളിൽ 36 ഡിഗ്രി വരെയുമാണ് പ്രതീക്ഷിക്കുന്ന താപനില. സാധാരണയേക്കാൾ 3 ഡിഗ്രി വരെ ചൂട് കൂടാൻ സാധ്യതയുണ്ടെന്നാണ് റിപ്പോർട്ട്.
ചൂടിനേക്കാൾ ആശങ്കപ്പെടുത്തുന്നത് ഉയരുന്ന യുവി ഇൻഡക്സ് (UV Index) ആണ്. കോന്നി, മൂന്നാർ എന്നിവിടങ്ങളിൽ സൂചിക 9 രേഖപ്പെടുത്തി. ഇവിടെ അതീവ ജാഗ്രത നിർദ്ദേശിക്കുന്ന ഓറഞ്ച് അലർട്ട് പ്രഖ്യാപിച്ചു. ചെങ്ങന്നൂർ, ചങ്ങനാശേരി, തൃത്താല എന്നിവിടങ്ങളിൽ സൂചിക 8 ആണ്. സൂചിക 8-ന് മുകളിൽ വരുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം.
പൊള്ളുന്ന ചൂടിനിടയിലും ആശ്വാസവാർത്തയുണ്ട്. നാളെ മുതൽ സംസ്ഥാനത്തിന്റെ എല്ലാ ജില്ലകളിലും നേരിയതോ മിതമായതോ ആയ മഴ ലഭിക്കാൻ സാധ്യതയുണ്ടെന്ന് കാലാവസ്ഥാ നിരീക്ഷകർ പറയുന്നു. വടക്കൻ കേരളത്തിൽ ഈ ദിവസങ്ങളിൽ തന്നെ മഴയെത്തിയേക്കും.
ജാഗ്രതാ നിർദ്ദേശം:
പകൽ 11 മണി മുതൽ 3 മണി വരെ നേരിട്ട് വെയിൽ ഏൽക്കുന്നത് ഒഴിവാക്കണമെന്ന് അധികൃതർ നിർദ്ദേശിക്കുന്നു. ധാരാളം വെള്ളം കുടിക്കാനും അയഞ്ഞ കോട്ടൺ വസ്ത്രങ്ങൾ ധരിക്കാനും ശ്രദ്ധിക്കണം. മലയോര മേഖലകൾ ഒഴികെയുള്ള പ്രദേശങ്ങളിൽ കഠിനമായ ചൂടും ഈർപ്പവുമുള്ള കാലാവസ്ഥ തുടരാനാണ് സാധ്യത.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.