കൈയ്യടി നേടി യുഡിഎഫിന്റെ ജനകീയ നേതാക്കള്‍; ഇടത് കോട്ടകള്‍ തകര്‍ത്തത് 'സ്റ്റാര്‍ പ്ലെയേഴ്‌സ്'

സംസ്ഥാനത്ത് അടുത്തിടെ നടന്ന തദ്ദേശ സ്വയംഭരണ തിരഞ്ഞെടുപ്പ് ഫലങ്ങള്‍ യുഡിഎഫിന്, പ്രത്യേകിച്ച് കോണ്‍ഗ്രസിന്, വലിയ ഉണര്‍വ് നല്‍കിയിരിക്കുകയാണ്. ജനകീയ അടിത്തറയുള്ള നേതാക്കളെ തന്ത്രപരമായി കളത്തിലിറക്കിയ കോണ്‍ഗ്രസിന്റെ നീക്കം ലക്ഷ്യം കണ്ടുവെന്ന് ഫലങ്ങള്‍ സൂചിപ്പിക്കുന്നു. തിരുവനന്തപുരത്തെ യുവതാരം വൈഷ്ണ സുരേഷ് മുതല്‍ മുന്‍ എം.എല്‍.എ. അനില്‍ അക്കര വരെയുള്ള നേതാക്കള്‍ക്ക് ജനങ്ങള്‍ നല്‍കിയ ഊഷ്മളമായ സ്വീകരണം ശ്രദ്ധേയമാണ്. പല ശക്തമായ ഇടതുപക്ഷ കോട്ടകളിലും ഈ നേതാക്കളെ ഉപയോഗിച്ച് മുന്നണിക്ക് വിജയം നേടാന്‍ സാധിച്ചു. ഈ ഫലങ്ങള്‍ സമീപകാല ചരിത്രത്തില്‍ എല്‍.ഡി.എഫിന് നേരിട്ട കനത്ത തിരിച്ചടിയുടെ സൂചന നല്‍കുന്നു, ഇത് വരാനിരിക്കുന്ന നിയമസഭാ തിരഞ്ഞെടുപ്പിന്റെ ഒരു സെമിഫൈനലായാണ് വിലയിരുത്തപ്പെടുന്നത്. തിരുവനന്തപുരത്ത് മുട്ടട വാര്‍ഡില്‍ യു.ഡി.എഫ്. സ്ഥാനാര്‍ത്ഥി വൈഷ്ണ സുരേഷ് നേടിയ വിജയം എല്‍.ഡി.എഫിനുള്ള ശക്തമായ താക്കീതാണ്. മത്സരിക്കാന്‍ അയോഗ്യയാക്കാന്‍ സി.പി.എം. കള്ളത്തരത്തിലൂടെ ശ്രമിച്ചുവെങ്കിലും കോടതിയുടെ ഇടപെടലിലൂടെ മത്സരിച്ച് വൈഷ്ണ വിജയിച്ച സംഭവം ഏറെ ജനശ്രദ്ധ നേടി. മത്സരത്തിലൂടെ തോല്‍പ്പിക്കാന്‍ സാധിക്കില്ലെന്ന് ഉറപ്പായപ്പോള്‍ സി.പി.എം. വളഞ്ഞവഴി തേടിയിരുന്നുവെങ്കിലും, വൈഷ്ണയുടെ വിജയം അവരുടെ നീക്കങ്ങള്‍ക്കുള്ള കനത്ത പ്രഹരമായി. ഇതിന് പുറമെ, മുന്‍ എം.എല്‍.എ. കെ.എസ്. ശബരീനാഥന്‍ കവടിയാര്‍ വാര്‍ഡില്‍ നേടിയ വിജയവും തലസ്ഥാന നഗരത്തില്‍ യു.ഡി.എഫിന്റെ മുന്നേറ്റത്തിന് ശക്തി പകര്‍ന്നു. വിവിധ കോര്‍പ്പറേഷനുകളിലും പഞ്ചായത്തുകളിലും യു.ഡി.എഫ്. നിര്‍ണ്ണായക വിജയങ്ങള്‍ സ്വന്തമാക്കി. കണ്ണൂര്‍ കോര്‍പ്പറേഷനിലെ 39-ാം ഡിവിഷനായ ആദികടലായിയില്‍ യു.ഡി.എഫ്. സ്ഥാനാര്‍ത്ഥി റിജില്‍ മാക്കുറ്റി 713 വോട്ടുകള്‍ക്ക് ചരിത്രപരമായ വിജയം നേടി. ഈ ഡിവിഷനില്‍ ആദ്യമായാണ് യു.ഡി.എഫ്. വിജയിക്കുന്നത്. ഇത് സി.ജെ.പി. മുന്നണിക്കേറ്റ കനത്ത തിരിച്ചടിയാണെന്ന് അദ്ദേഹം പ്രതികരിച്ചു. കൊച്ചി കോര്‍പ്പറേഷനിലെ സ്റ്റേഡിയം ഡിവിഷനില്‍ കെ.പി.സി.സി. ജനറല്‍ സെക്രട്ടറി ദീപ്തി മേരി വര്‍ഗീസ് 1038 വോട്ടുകളുടെ വലിയ ഭൂരിപക്ഷത്തില്‍ വിജയിച്ചു. കൂടാതെ, പള്ളിക്കല്‍ ജില്ലാ പഞ്ചായത്തില്‍ സി.പി.ഐ.യില്‍ നിന്നും യു.ഡി.എഫിലെത്തിയ ശ്രീനാദേവി കുഞ്ഞമ്മ സി.പി.ഐ.യുടെ ശ്രീലതാ രമേശിനെ പരാജയപ്പെടുത്തിയത് മുന്നണിക്ക് ലഭിച്ച മറ്റൊരു നേട്ടമാണ്. 15 വര്‍ഷത്തെ ഇടവേളയ്ക്ക് ശേഷം പഞ്ചായത്ത് തിരഞ്ഞെടുപ്പില്‍ മത്സരിച്ച മുന്‍ എം.എല്‍.എയും കെ.പി.സി.സി. ജനറല്‍ സെക്രട്ടറിയുമായ അനില്‍ അക്കര തൃശൂര്‍ ജില്ലയിലെ അടാട്ട് ഗ്രാമപഞ്ചായത്തിലെ 15-ാം വാര്‍ഡായ സംസ്‌കൃതം കോളജില്‍ ഉജ്ജ്വല വിജയം നേടി. 363 വോട്ടുകള്‍ നേടിയ അദ്ദേഹത്തിന് എതിര്‍ സ്ഥാനാര്‍ത്ഥിയായ സി.പി.എം. നേതാവ് കെ.ബി. തിലകന് 149 വോട്ടുകള്‍ മാത്രമാണ് ലഭിച്ചത്. ബി.ജെ.പി.യുടെ സിറ്റിങ് സീറ്റായിരുന്ന ഇവിടെ അവരുടെ സ്ഥാനാര്‍ത്ഥിക്ക് വെറും 49 വോട്ടുകള്‍ മാത്രമേ ലഭിച്ചുള്ളൂ. ഈ വിജയം തദ്ദേശീയ തലത്തില്‍ അനില്‍ അക്കരയുടെ സ്വീകാര്യതയും, യു.ഡി.എഫിന്റെ സംഘടനാപരമായ ശക്തിയും എടുത്തു കാണിക്കുന്നു. മൊത്തത്തില്‍, ഈ തദ്ദേശ പോരാട്ടത്തിലെ ഫലങ്ങള്‍ എല്‍.ഡി.എഫിന് ആശങ്കയും യു.ഡി.എഫിന് നിയമസഭാ തിരഞ്ഞെടുപ്പിലേക്ക് കടക്കാന്‍ ആവശ്യമായ ആത്മവിശ്വാസവും നല്‍കുന്നു.