തിരുവനന്തപുരം: മുഖ്യമന്ത്രി പിണറായി വിജയനും സംഘവും യൂറോപ്പ് സന്ദർശനത്തിന് ഒരുങ്ങുന്നു. ലണ്ടൻ, ഫിൻലൻഡ്, നോർവേ തുടങ്ങിയ രാജ്യങ്ങളിലാണ് സന്ദർശനം നടത്തുന്നത്. വിദേശയാത്രയ്ക്ക് കേന്ദ്രസർക്കാർ അനുമതിക്കായി പൊതു ഭരണ വകുപ്പ് നടപടികൾ ആരംഭിച്ചു. സംഘത്തില്‍ വിദ്യാഭ്യാസമന്ത്രി വി ശിവന്‍കുട്ടിയുമുണ്ട്.
ഒക്ടോബർ ആദ്യമാണ് രണ്ടാഴ്ച നീളുന്ന വിദേശയാത്ര തീരുമാനിച്ചിരിക്കുന്നത്. ചീഫ് സെക്രട്ടറി വി.പി ജോയ് വിദ്യാഭ്യാസ വകുപ്പിലെ ഉന്നത ഉദ്യോഗസ്ഥർ എന്നിവരാണ് സംഘത്തിലുള്ള മറ്റ് അംഗങ്ങൾ. വിദ്യാഭ്യാസ മേഖലയിലെ സഹകരണം അടക്കം ചർച്ച ചെയ്യുന്നതിനാണ് ഫിൻലന്‍ഡ് സന്ദർശനം. മുമ്പ് ഫിൻലന്‍ഡ് സർക്കാർ കേരളം സന്ദർശിച്ചിരുന്നു. ഇവരുടെ ക്ഷണപ്രകാരമാണ് ഫിൻലൻഡ് സന്ദർശനം എന്നാണ് സർക്കാരിന്‍റെ വിശദീകരണം.
മുഖ്യമന്ത്രിയും സംഘവും ഫിൻലാൻഡിലെ നോക്കിയ നിർമ്മാണ യൂണിറ്റും സന്ദർശിച്ചേക്കും. ഫിൻലൻഡിന് പുറമേ നോർവേയും സംഘം സന്ദർശിക്കും. ലണ്ടൻ സന്ദർശനത്തിൽ ധനമന്ത്രി കെ.എൻ ബാലഗോപാൽ ഉൾപ്പെടെയുള്ളവർ ഉണ്ടാകുമെന്നാണ് സൂചന. വിദേശയാത്രയ്ക്ക് കേന്ദ്രസർക്കാരിൽ നിന്നുള്ള അനുമതിക്കായി പൊതു ഭരണ വകുപ്പ് നടപടി ആരംഭിച്ചു.
