ന്യൂഡല്‍ഹി : മുത്തൂറ്റ് ഗ്രൂപ്പ് ചെയര്‍മാന്‍ എം. ജി ജോര്‍ജ് മുത്തൂറ്റ് അന്തരിച്ചു. ഡല്‍ഹിയിലെ വസതിയിലായിരുന്നു അന്ത്യം. 72 വയസായിരുന്നു. കഴിഞ്ഞ വര്‍ഷം ഫോബ്‌സ് മാഗസിന്‍ പ്രസിദ്ധീകരിച്ച ഇന്ത്യയിലെ അതിസമ്പന്നരുടെ പട്ടികയില്‍ ഇടം നേടിയിരുന്നു. കേരളത്തിലെ ഏറ്റവും സമ്പന്നനായ വ്യക്തിയായും കഴിഞ്ഞ വർഷം മാസിക റിപ്പോർട്ട് ചെയ്തത് ജോര്‍ജ് മുത്തൂറ്റിനെയായിരുന്നു.
ഓർത്തഡോക്സ് സഭാ മുൻ ട്രസ്റ്റിയായിരുന്നു. ഫെഡറേഷൻ ഓഫ് ഇന്ത്യൻ ചേമ്പർ ഓഫ് കൊമേഴ്സ് ആന്‍ഡ് ഇൻഡസ്ട്രിയുടെ ദേശീയ എക്സിക്യൂട്ടിവ് അംഗവും സ്റ്റേറ്റ് കൗൺസിൽ അംഗവുമായിരുന്നു. സാറ ജോർജ് മുത്തൂറ്റാണ് ഭാര്യ. മൂന്നു മക്കളിൽ ഒരാളായ പോൾ മുത്തുറ്റ് 2009 ൽ കൊല്ലപ്പെട്ടിരുന്നു.
