പാകിസ്ഥാന് സൂപ്പര്‍ ലീഗ് (പിഎസ്എല്‍) ക്രിക്കറ്റ് മത്സരം ഇന്ന് രാത്രി 8 മണിക്ക് റാവല്‍പിണ്ടി ക്രിക്കറ്റ് സ്റ്റേഡിയത്തില്‍ നടക്കാനിരിക്കെ, സ്റ്റേഡിയത്തിന് നേരെ ഡ്രോണ്‍ ആക്രമണം. പെഷവാര്‍ സല്‍മിയും കറാച്ചി കിംഗ്സും തമ്മിലുള്ള മത്സരമാണ് ഇന്ന് സ്റ്റേഡിയത്തില്‍ ഷെഡ്യൂള്‍ ചെയ്തിരുന്നത്. ഇന്ത്യയിലെ 15 സൈനിക ലക്ഷ്യങ്ങള്‍ ആക്രമിക്കാന്‍ ഇസ്ലാമാബാദ് ശ്രമം നടത്തിയതിന് മണിക്കൂറുകള്‍ക്ക് ശേഷമാണ് ഈ സംഭവവികാസം. ഇതിന് മറുപടിയായി ഇന്ത്യ വ്യാഴാഴ്ച ലാഹോറിലെ പാകിസ്ഥാന്റെ വ്യോമ പ്രതിരോധ റഡാര്‍ സംവിധാനങ്ങള്‍ തകര്‍ത്തിരുന്നു.
ലാഹോര്‍, ഗുജ്റന്‍വാല, ചക്വാള്‍, ബഹവല്‍പൂര്‍, മിയാനോ, കറാച്ചി, ഛോര്‍, റാവല്‍പിണ്ടി, അറ്റോക്ക് എന്നിവിടങ്ങളില്‍ ചില ഡ്രോണുകള്‍ നിര്‍വീര്യമാക്കിയതായി പാക് സൈനിക വക്താവ് ലഫ്റ്റനന്റ് ജനറല്‍ അഹമ്മദ് ഷെരീഫ് ചൗധരി നേരത്തെ അവകാശപ്പെട്ടിരുന്നു. എന്നാല്‍, ചൈനീസ് നിര്‍മ്മിത എച്ച്ക്യു-9 മിസൈല്‍ പ്രതിരോധ സംവിധാന യൂണിറ്റുകളെ ഇസ്രായേല്‍ നിര്‍മ്മിത ഹാരോപ് ഡ്രോണുകള്‍ ഉപയോഗിച്ച് നേരിട്ടതോടെ ലാഹോറിലെ പാക് സൈന്യത്തിന് പ്രതിരോധ ശേഷിയില്ലാതായി.
