തിരുവനന്തപുരം: അരീക്കോട് സ്പെഷല്‍ ഓപ്പറേഷന്‍ പൊലീസ് ക്യാമ്പിലെ ഗ്രൂപ്പ് കമാന്‍ഡോ വയനാട് കോട്ടത്തറ മൈലാടിപ്പടി സ്വദേശി വിനീത് ജീവനൊടുക്കിയത് അത്യന്തം വേദനാജനകവും സേനയുടെ ആത്മവീര്യം കെടുത്തുന്നതുമാണെന്ന് പ്രതിപക്ഷ നേതാവ് വിഡി സതീശന്‍. ആത്മഹത്യ മേലുദ്യോഗസ്ഥരുടെ മാനസിക പീഡനത്തെ തുടര്‍ന്നാണെനാണ് ആരോപണം. വിനീത് ഇതു വ്യക്തമാക്കിക്കൊണ്ട് അയച്ച സന്ദേശങ്ങളും മാധ്യമങ്ങളിലൂടെ പുറത്തു വന്നിട്ടുണ്ട്. വിനീതിനെ ആത്മഹത്യയ്ക്ക് പ്രേരിപ്പിച്ചത് ഏറ്റവും അവസാനമായി അവധി നിഷേധിച്ചതാണെന്ന് സഹപ്രവര്‍ത്തകര്‍ പറയുന്നത്.
ഗര്‍ഭിണിയായ ഭാര്യയെ ആശുപത്രിയില്‍ കൊണ്ടു പോകാന്‍ അവധിക്ക് മൂന്നു തവണ അപേക്ഷ നല്‍കിയിട്ടും പരിഗണിക്കാത്തത് മനുഷ്യത്വരഹിതമാണ്. ആത്മഹത്യ നിത്യസംഭവമായി മാറിയിരിക്കുകയാണ് നിയമവും നീതിയും നടപ്പാക്കേണ്ട പൊലീസ് സേനയില്‍. അമിത ജോലിഭാരം പൊലീസുകാരുടെ മാനസിക സമ്മര്‍ദ്ദം വര്‍ധിപ്പിക്കുകയാണെന്നും ഇത് അവസാനിപ്പിക്കാനുള്ള നടപടി സ്വീകരിക്കണമെന്നും ആവശ്യപ്പെട്ട് നിയമസഭയില്‍ അടിയന്തര പ്രമേയമായി പ്രതിപക്ഷം ഈ വിഷയം അവതരിപ്പിച്ചതുമാണ്. വിനീതിന്റെ ആത്മഹത്യ നടപടികള്‍ സ്വീകരിക്കുമെന്ന് മുഖ്യമന്ത്രി അന്ന് നിയമസഭയില്‍ നല്‍കിയ ഉറപ്പ് പാലിക്കപ്പെട്ടില്ലെന്നു വ്യക്തമാക്കുന്നതാണെന്നും പ്രതിപക്ഷ നേതാവ് വിഡി സതീശന്‍.
