കൊല്ലം : പണിമുടക്കിന്‍റെ പേരില്‍ ഹയർ സെക്കന്‍ഡറി സ്കൂളിനകത്ത് സിപിഎമ്മുകാരുടെ അതിക്രമം. കടയ്ക്കൽ ചിതറ സർക്കാർ ഹയർ സെക്കൻഡറി സ്കൂളിൽ ജോലിക്കെത്തിയ 15 അധ്യാപകർക്കെതിരെയാണ് സിപിഎം സമരാനുകൂലികള്‍ അതിക്രമവും ഭീഷണിയും നടത്തിയത്. പണിമുടക്ക് ദിവസം ജോലിക്കെത്തിയതിന് അധ്യാപകരെ ക്ലാസ് മുറിയില്‍ പൂട്ടിയിടുകയും അസഭ്യ വർഷം നടത്തുകയും ചെയ്തു. സിപിഎം ലോക്കല്‍ കമ്മറ്റി അംഗവും പിടിഎ പ്രസിഡന്‍റും സർവീസ് സഹകരണ ബാങ്ക് ജീവനക്കാരനും മുൻ ചിതറ പഞ്ചായത്ത് അംഗവുമായ എസ്.ഷിബുലാലിന്‍റെ നേതൃത്വത്തിലാണ് സമരത്തിന്‍റെ പേരില്‍ സിപിഎം പ്രവർത്തകരുടെ അക്രമം .
വൈകിട്ട് പുറത്തിറങ്ങുമ്പോള്‍ ‘കാണിച്ചുതരാമെന്ന്’ ഷിബുലാല്‍ അധ്യാപകരെ ഭീഷണിപ്പെടുത്തി. അധ്യാപകർ ഇപ്പോഴും ക്ലാസ്മുറിയിൽ തുടരുകയാണ്. പോലീസ് സ്ഥലത്തെത്തിയെങ്കിലും ഒരു നടപടിയും സ്വീകരിച്ചില്ലെന്ന് അധ്യാപകർ ആരോപിച്ചു. വൻ പോലീസ് സന്നാഹം സ്കൂളിനു മുന്നിൽ നിലയുറപ്പിച്ചിട്ടുണ്ട്.