സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിലേക്ക് തിരഞ്ഞെടുക്കപ്പെട്ട അംഗങ്ങള് ഡിസംബര് 21-ന് സത്യപ്രതിജ്ഞ ചെയ്ത് അധികാരമേല്ക്കുമെന്ന് സംസ്ഥാന തിരഞ്ഞെടുപ്പ് കമ്മീഷണര് എ. ഷാജഹാന് അറിയിച്ചു. സത്യപ്രതിജ്ഞാ ചടങ്ങുകള് സുഗമമാക്കുന്നതിനായി കമ്മീഷന് മാര്ഗ്ഗനിര്ദ്ദേശങ്ങള് പുറപ്പെടുവിച്ചിട്ടുണ്ട്. ഗ്രാമ, ബ്ലോക്ക്, ജില്ലാ പഞ്ചായത്തുകള്, മുനിസിപ്പല് കൗണ്സിലുകള് എന്നിവിടങ്ങളില് രാവിലെ 10 മണിക്കും കോര്പ്പറേഷനുകളില് 11.30 നുമാണ് നടപടികള് ആരംഭിക്കുക. സത്യപ്രതിജ്ഞാ ചടങ്ങുമായി ബന്ധപ്പെട്ട പ്രവര്ത്തനങ്ങള് സമയബന്ധിതമായി നടക്കുന്നുണ്ടെന്ന് ജില്ലാ തിരഞ്ഞെടുപ്പ് ഉദ്യോഗസ്ഥര് നിരീക്ഷിക്കണമെന്നും റിപ്പോര്ട്ട് സമര്പ്പിക്കണമെന്നും കമ്മീഷന് നിര്ദ്ദേശിച്ചു.
തെരഞ്ഞെടുക്കപ്പെട്ടവരില് മുതിര്ന്ന അംഗം / കൗണ്സിലര് ആയിരിക്കും ആദ്യം സത്യപ്രതിജ്ഞ ചെയ്യേണ്ടത്. കോര്പ്പറേഷനുകളിലും ജില്ലാപഞ്ചായത്തുകളിലും ജില്ലാ കലക്ടര്മാരും, ഗ്രാമ, ബ്ലോക്ക് പഞ്ചായത്തുകളില് അതത് സ്ഥാപനങ്ങളിലെ വരണാധികാരികളെയുമാണ് ആദ്യ അംഗത്തെ സത്യപ്രതിജ്ഞ ചെയ്യിക്കുന്നതിനായി ചുമതലപ്പെടുത്തിയിട്ടുള്ളത്. മുനിസിപ്പല് കൗണ്സിലുകളില് ഇതിനായി നിയോഗിച്ചിട്ടുള്ള വരണാധികാരിയാണ് ആദ്യ അംഗത്തെ പ്രതിജ്ഞയെടുപ്പിക്കേണ്ടത്. ഈ മുതിര്ന്ന അംഗം പ്രതിജ്ഞയെടുത്ത ശേഷം മറ്റ് അംഗങ്ങളെ സത്യപ്രതിജ്ഞ ചെയ്യിക്കും. സത്യപ്രതിജ്ഞാ ചടങ്ങ് കഴിഞ്ഞാലുടന് ഈ മുതിര്ന്ന അംഗത്തിന്റെ അധ്യക്ഷതയില് തിരഞ്ഞെടുക്കപ്പെട്ട എല്ലാ അംഗങ്ങളുടേയും ആദ്യ യോഗം ചേരും.
അധ്യക്ഷന്, ഉപാധ്യക്ഷന് സ്ഥാനത്തേക്കുള്ള തിരഞ്ഞെടുപ്പുകള്ക്കുള്ള തീയതികളും പ്രഖ്യാപിച്ചു. മേയര്, മുനിസിപ്പല് ചെയര്മാന് സ്ഥാനത്തേക്കുള്ള തിരഞ്ഞെടുപ്പ് ഡിസംബര് 26-ന് രാവിലെ 10.30നും ഡെപ്യൂട്ടി മേയര്, വൈസ് ചെയര്മാന് തിരഞ്ഞെടുപ്പ് 2.30നും നടക്കും. ഗ്രാമ, ബ്ലോക്ക്, ജില്ലാ പഞ്ചായത്ത് പ്രസിഡന്റ് സ്ഥാനത്തേക്കുള്ള തിരഞ്ഞെടുപ്പ് ഡിസംബര് 27-ന് രാവിലെ 10.30നും വൈസ് പ്രസിഡന്റ് തിരഞ്ഞെടുപ്പ് 2.30നും നടക്കും. തിരഞ്ഞെടുപ്പ് നടത്താന് വോട്ടവകാശമുള്ള അംഗങ്ങളുടെ എണ്ണത്തിന്റെ പകുതി ക്വാറം നിര്ബന്ധമാണ്. ക്വാറമില്ലെങ്കില് തൊട്ടടുത്ത പ്രവൃത്തിദിവസം യോഗം ചേര്ന്ന ക്വാറം ഇല്ലാതെ തിരഞ്ഞെടുപ്പ് നടത്താമെന്നും കമ്മീഷന് വ്യക്തമാക്കി.
അതേസമയം, സംസ്ഥാനത്ത് തദ്ദേശ തിരഞ്ഞെടുപ്പുമായി ബന്ധപ്പെട്ട് പ്രഖ്യാപിച്ചിരുന്ന മാതൃകാ പെരുമാറ്റച്ചട്ടം പിന്വലിച്ചു. നവംബര് 10ന് നിലവില് വന്ന പെരുമാറ്റച്ചട്ടമാണ് ഡിസംബര് 15ന് പിന്വലിച്ചത്. എന്നാല്, സ്ഥാനാര്ഥികള് അന്തരിച്ചതിനെ തുടര്ന്ന് തിരഞ്ഞെടുപ്പ് നടക്കാത്ത ചില വാര്ഡുകളില് പെരുമാറ്റച്ചട്ടം തുടരും. മലപ്പുറം ജില്ലയിലെ മൂത്തേടം ഗ്രാമ പഞ്ചായത്ത് (7ാം വാര്ഡ്), എറണാകുളം ജില്ലയിലെ പാമ്പാക്കുട ഗ്രാമ പഞ്ചായത്ത് (10ാം വാര്ഡ്), തിരുവനന്തപുരം മുനിസിപ്പല് കോര്പ്പറേഷനിലെ 66-ാം ഡിവിഷന് (വിഴിഞ്ഞം) എന്നിവിടങ്ങളില് തിരഞ്ഞെടുപ്പ് പൂര്ത്തിയാകുന്നത് വരെ മാതൃകാ പെരുമാറ്റച്ചട്ടം നിലനില്ക്കുമെന്നും കമ്മീഷന് അറിയിച്ചു.
