മുഖ്യമന്ത്രി ഭിന്നിപ്പിന്‍റെ വക്താവാകുന്നു, യാത്രാചെലവ് ഏറ്റെടുത്ത കെപിസിസിയെ പരിഹസിച്ചത് തരംതാഴ്ന്ന നടപടി: വി.എം സുധീരന്‍

കോവിഡ് പ്രതിരോധരംഗത്ത് കേരളം ഏറെ മുന്നോട്ടു പോയെങ്കിലും ഇനിയും നമുക്ക് തരണം ചെയ്യാനുള്ളത് വലിയ കടമ്പകളാണ്.  പ്രവാസി സഹോദരങ്ങളെ അവർക്ക് സാമ്പത്തികബാധ്യത വരാതെ തിരിച്ചെത്തിക്കാൻ വേണ്ട സാഹചര്യം ഒരുക്കുക, അവർക്ക് അനിവാര്യമായ ക്വാറന്റീൻ ഉൾപ്പെടെയുള്ള എല്ലാ സൗകര്യങ്ങളും കുറ്റമറ്റ രീതിയിൽ ഏർപ്പെടുത്തുക, മറ്റ് സംസ്ഥാനങ്ങളിൽ നിന്ന് കേരളത്തിലേക്ക് വരാനാഗ്രഹിക്കുന്ന സഹോദരങ്ങൾക്ക് അതിനുള്ള സമ്പൂർണ്ണ സൗകര്യങ്ങൾ ചെയ്തു കൊടുക്കുക തുടങ്ങിയ വളരെയേറെ ശ്രമകരമായ കാര്യങ്ങൾ ഇനിയും ചെയ്തുതീർക്കാനുണ്ട്.
എന്നാൽ കേരളത്തിലെ സർക്കാർ സംവിധാനത്തെയും ജനങ്ങളെയും ഒറ്റക്കെട്ടായി ഇതിനെല്ലാം അണിനിരത്തുന്നതിനു നേതൃത്വപരമായ പങ്കു വഹിക്കേണ്ട ബഹു മുഖ്യമന്ത്രി ആകട്ടെ തനിക്ക് ഇഷ്ടമില്ലാത്ത രാഷ്ട്രീയ പ്രസ്ഥാനങ്ങളെയും നേതാക്കളെയും അധിക്ഷേപിക്കാനും പരിഹസിക്കാനുമാണ് ഇപ്പോഴും ശ്രമിച്ചു വരുന്നത്. എല്ലാരെയും ഒന്നിപ്പിക്കേണ്ട ആൾ തന്നെ ഭിന്നിപ്പിന്റെ വക്താവകുന്ന വൈരുധ്യമാണ് ഇതിൽ കാണുന്നത്. കോവിഡ് പ്രതിരോധ പ്രവർത്തനങ്ങൾ വിശദീകരിക്കുന്ന സായാഹ്ന വാർത്താ സമ്മേളനങ്ങളും ‘നാം മുന്നോട്ട് ‘ എന്ന സർക്കാർ പ്രചരണപരിപാടിയുമാണ് ഇതിനെല്ലാം ദുരുപയോഗപ്പെടുത്തുന്നത്. അതിഥി തൊഴിലാളികളുടെ യാത്രാചെലവ് അതാത് പി സി സി കൾ വഹിക്കണമെന്ന കോൺഗ്രസ് അധ്യക്ഷ സോണിയ ഗാന്ധിയുടെ നിർദ്ദേശത്തെത്തുടർന്ന് അതിന് മുന്നോട്ടുവന്ന കെപിസിസിയെ പരിഹസിച്ച മുഖ്യമന്ത്രിയുടെ നിലപാട് വളരെ തരംതാഴ്ന്ന നടപടിയായിപ്പോയി.