അദാനിക്കെതിരെ വീണ്ടും രാഹുല് ഗാന്ധി. കല്ക്കരി വില കൃതൃമമായി കാണിച്ച് അദാനി കോടികള് തട്ടിയെന്നാണ് രാഹുല് ഗാന്ധി വാര്ത്താസമ്മേളനത്തില് ആരോപിച്ചത്. ഫിനാന്ഷ്യല് ടൈംസ് വാര്ത്ത ഉദ്ധരിച്ചാണ് രാഹുല് ഗാന്ധിയുടെ വിമര്ശനം. പ്രധാനമന്ത്രി നരേന്ദ്ര മോദി അദാനിക്ക് സംരക്ഷണം നല്കുകയാണെന്നും രാഹുല് ആരോപിച്ചു. ഇന്തോനേഷ്യയില് നിന്ന് വാങ്ങുന്ന കല്ക്കരി ഇരട്ടി വിലക്ക് ഇന്ത്യയില് വില്ക്കുകയാണ്. കരിഞ്ചന്ത വില്പ്പനയ്ക്ക് സര്ക്കാര് കൂട്ടുനില്ക്കുകയാണെന്നും രാഹുല് ഗാന്ധി ആരോപിച്ചു. വൈദ്യുതി ചാര്ജ് വര്ധനയായി ഈ അധിക നികുതി ഭാരം ജനങ്ങളിലെത്തുന്നു. ഇന്ത്യയിലെ ഒരു മാധ്യമങ്ങളും ഈ വാര്ത്ത ഏറ്റെടുക്കുന്നില്ല. പ്രധാനമന്ത്രി പതിവ് പോലെ അദാനിയെ രക്ഷിക്കുന്നു. സര്ക്കാര് അദാനിക്ക് ബ്ലാങ്ക് ചെക്ക് നല്കിയിരിക്കുകയാണ്. അദാനിക്കെതിരെ ഒരന്വേഷണവും നടത്തുന്നില്ലെന്നും രാഹുല് കുറ്റപ്പെടുത്തി. അദാനിക്കെതിരെ മോദി എന്തുകൊണ്ട് അന്വേഷണം നടത്തുന്നില്ല. ഇതിന് കാരണം എന്താണെന്നും ഇതിന് പിന്നിലെ ശക്തി ഏതാണെന്നും രാഹുല് ഗാന്ധി ചോദിച്ചു.