ന്യൂഡല്‍ഹി: കോണ്‍ഗ്രസ് അധ്യക്ഷന്‍ രാഹുല്‍ഗാന്ധി ജൂണ്‍ ഏഴിന് തന്റെ മണ്ഡലമായ വയനാട്ടില്‍ എത്തും. രണ്ടുദിവസത്തെ സന്ദര്‍ശനമാണ് തീരുമാനിച്ചിരിക്കുന്നത്. മണ്ഡലത്തില്‍ റെക്കോര്‍ഡ് ഭൂരിപക്ഷത്തോടെ വിജയിപ്പിച്ച തന്റെ പ്രിയപ്പെട്ട വോട്ടര്‍മാരോട് നന്ദി അറിയിക്കുന്നതിനും യു.ഡി.എഫ് പ്രവര്‍ത്തകരെ നേരില്‍ കാണുന്നതിനും ര ഉടന്‍ മണ്ഡലത്തിലെത്തുമെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി മെയ് 24ന് അറിയിച്ചിരുന്നു.
വയനാട് നൽകിയ സ്നേഹത്തിനും പിന്തുണക്കും നന്ദി അർപ്പിക്കുവാൻ കോൺഗ്രസ്സ് അധ്യക്ഷനും വയനാട് നിയോജകമണ്ഡലം നിയുക്ത എം.പിയുമായ ശ്രീ രാഹുൽ ഗാന്ധി ജൂൺ 7, 8 തീയതികളിൽ വയനാടിലെത്തുന്നു.
— Rahul Gandhi – Wayanad (@RGWayanadOffice) May 31, 2019
എന്റെ തെരഞ്ഞെടുപ്പ് വിജയത്തിനായി അഹോരാത്രം പ്രവര്‍ത്തിച്ച യുഡി എഫിന്റെ എല്ലാ പ്രവര്‍ത്തകരോടും നേതാക്കളോടും തീര്‍ത്താല്‍ തീരാത്തത്ര നന്ദിയും കടപ്പാടുമുണ്ടെന്നുമായിരുന്നു രാഹുല്‍ഗാന്ധി ട്വിറ്ററിലൂടെ അറിയിച്ചിരുന്നത്.
‘എന്റെ തിരഞ്ഞെടുപ്പ് വിജയത്തിനായി അഹോരാത്രം പ്രവര്‍ത്തിച്ച യുഡി എഫിന്റെ എല്ലാ പ്രവര്‍ത്തകരോടും നേതാക്കളോടും തീര്‍ത്താല്‍ തീരാത്തത്ര നന്ദിയും കടപ്പാടുമുണ്ട്. റിക്കാര്‍ഡ് ഭൂരിപക്ഷത്തോടെ എന്നെ വിജയിപ്പിച്ച എന്റെ പ്രിയപ്പെട്ട വോട്ടര്‍മാരോട് നന്ദി അറിയിക്കുന്നതിനും യു ഡി എഫ് പ്രവര്‍ത്തകരെ നേരില്‍ കാണുന്നതിനും ഉടന്‍ മണ്ഡലത്തിലെത്തും. വൈകാതെ നേരില്‍ കാണാം. സ്നേഹത്തോടെ, രാഹുല്‍ ഗാന്ധി.’ അദ്ദേഹം ട്വിറ്ററില്‍ കുറിച്ചു.
നാലേകാല്‍ ലക്ഷത്തിനുമേല്‍ വോട്ടിന്റെ ഭൂരിപക്ഷത്തിലാണ് രാഹുല്‍ ഗാന്ധി വയനാട്ടില്‍ ജയിച്ചത്.