കൊച്ചി : കാക്കനാട് ലഹരിമരുന്ന് കേസില്‍ അറസ്റ്റിലായ തിരുവല്ല കരിഞ്ഞാലിക്കുളം വീട്ടില്‍ ത്വയ്ബ ഔലാദ് റിമാന്‍ഡില്‍. ലഹരിമരുന്ന് കേസില്‍ എക്സൈസ് ആദ്യം കസ്റ്റഡിയിലെടുക്കുകയും പിന്നീട് വിട്ടയക്കുകയും ചെയ്ത ത്വയ്ബയെ ഇന്നലെയാണ് എക്സൈസ് ക്രൈംബ്രാഞ്ച് അറസ്റ്റ് ചെയ്തത്. കേസ് ഏറ്റെടുത്ത എക്സൈസ് ക്രൈംബ്രാഞ്ച് കഴിഞ്ഞ ദിവസം ത്വയ്ബയെ വിളിച്ചുവരുത്തി മണിക്കൂറുകളോളം ചോദ്യം ചെയ്തതിന് ശേഷമാണ് അറസ്റ്റ് രേഖപ്പെടുത്തിയത്.
അതിനിടെ, ത്വയ്ബയെ കാക്കനാട്ടെ ഫ്ലാറ്റിലെത്തിച്ച്‌ അന്വേഷണ സംഘം തെളിവെടുപ്പ് പൂര്‍ത്തിയാക്കി. ത്വയ്ബ ഉള്‍പ്പെട്ട സംഘമാണ് കാറില്‍ മയക്കുമരുന്ന് കടത്തിയതെന്ന് ചോദ്യം ചെയ്യലിൽ അന്വേഷണ സംഘം സ്ഥിരീകരിക്കുകയായിരുന്നു. ചോദ്യം ചെയ്യലില്‍ ആദ്യം ആരോപണങ്ങള്‍ നിഷേധിച്ചെങ്കിലും തെളിവുകള്‍ നിരത്തിയതോടെ ത്വയ്ബക്ക് കുറ്റം സമ്മതിക്കേണ്ടിവന്നു.
