തുർക്കിയിലെ ഇസ്താംബുളിൽ നടന്ന വനിതാ ബോക്‌സിംഗ് ലോക ചാമ്പ്യൻഷിപ്പിൽ ഇന്ത്യക്ക് സ്വർണ്ണം. തായ്‌ലൻഡിന്‍റെ ജിറ്റ്‌പോംഗ് ജിറ്റാമാസിനെ പരാജയപ്പെടുത്തി ഇന്ത്യയുടെ നിഖാത് സരീനാണ് സ്വർണ്ണം നേടിയത്. 52 കിലോ വിഭാഗത്തിലാണ് നിഖാത് സരീന്റെ നേട്ടം. ഈ നേട്ടം സ്വന്തമാക്കുന്ന അഞ്ചാമത്തെ ഇന്ത്യക്കാരിയാണ് സരീന്‍.

ഫൈനൽ പോരാട്ടത്തിൽ 5–0 നാണ് (30-27, 29-28, 29-28, 30-27, 29-28) ടോക്കിയോ ഒളിമ്പിക്സിലെ ക്വാർട്ടർ ഫൈനലിലെത്തിയ ജിറ്റ്പോംഗിനെ സരീൻ കീഴടക്കിയത്. നിഖാത്ത് സരിന്‍ സ്വന്തമാക്കിയത്. നേരത്തെ ബുധനാഴ്ച നടന്ന സെമിയില്‍ ബ്രസീലിന്‍റെ കരോളിന്‍ ഡി അല്‍മേഡയെ കീഴടക്കിയാണ് സരീന്‍ കിരീടപോരാട്ടത്തിന് യോഗ്യത നേടിയത്. ആ മത്സരത്തിലും വിജയം ഏകപക്ഷീയമായിരുന്നു (5-0).

മേരി കോം, സരിത ദേവി, ജെന്നി ആര്‍.എല്‍, ലേഖ കെ.സി എന്നിവര്‍ക്ക് ശേഷം ലോക ചാമ്പ്യന്‍ഷിപ്പില്‍ സ്വര്‍ണ്ണ മെഡല്‍ നേടുന്ന അഞ്ചാമത്തെ ഇന്ത്യന്‍ വനിതാ ബോക്‌സറാണ് സരീന്‍.