ചെറുവിമാനത്തില്‍ ഒറ്റയ്ക്ക് ലോകം ചുറ്റുന്ന ഏറ്റവും പ്രായം കുറഞ്ഞ വ്യക്തിയായി റെക്കോർഡിട്ടിരിക്കുകയാണ് 17 കാരനായ ബ്രിട്ടീഷ്-ബെല്‍ജിയന്‍ പൈലറ്റ് മാക്ക് റൂഥർഫോർഡ്.

രണ്ട് സമുദ്രങ്ങൾ, അഞ്ച് ഭൂഖണ്ഡങ്ങൾ, 52 രാജ്യങ്ങൾ എന്നിവ പിന്നിട്ടാണ് മാക്ക് ദൗത്യം പൂർത്തിയാക്കിയത്. ഈ വർഷം മാർച്ച് 23 ന് പറന്നുയർന്ന മാക്കിന് ചരിത്രം സൃഷ്ടിക്കാൻ 5 മാസം വേണ്ടി വന്നു.

ഇന്ത്യ, ചൈന, ദക്ഷിണ കൊറിയ, ജപ്പാൻ എന്നിവിടങ്ങളിലേക്കുള്ള യാത്രയ്ക്കിടെ വിമാനം ആഫ്രിക്കൻ ഭൂഖണ്ഡത്തിനും മെക്സിക്കോ ഉൾക്കടലിനും കുറുകെ പറന്നു. അമേരിക്കയുടെ പടിഞ്ഞാറൻ തീരത്ത് നിന്ന് മെക്സിക്കോയിലേക്ക് പോകുന്നതിന് മുമ്പ് അദ്ദേഹം വടക്കൻ പസഫിക്കിന് മുകളിലൂടെ അലാസ്കയിലേക്ക് യാത്ര ചെയ്തു. അവിടെ നിന്ന് യുഎസിന്‍റെ കിഴക്കൻ തീരത്തിലൂടെ കാനഡയിലേക്കും ഒടുവിൽ അറ്റ്ലാന്‍റിക് കടന്ന് യൂറോപ്പിലേക്കും പോകുന്നതിനുമുമ്പ് അദ്ദേഹം ഒരിക്കൽ കൂടി വടക്കോട്ട് പറന്നു. – ദി ഗാർഡിയൻ റിപ്പോർട്ട് ചെയ്യുന്നു.

18 വയസും 150 ദിവസവും പ്രായമുള്ള ട്രാവിസ് ലുഡ്‌ലോ 2021-ൽ സ്ഥാപിച്ച ഗിന്നസ് റെക്കോർഡാണ് മാക്ക് റഥർഫോർഡ് തകർത്തത്. ഇത് മാത്രമല്ല, 2022 ജനുവരിയിൽ ലോകമെമ്പാടും അൾട്രാലൈറ്റ് വിമാനം പറത്തിയ തന്റെ 19 വയസ്സുള്ള സഹോദരി സാറയുടെ റെക്കോർഡ് പോലും മാക്ക് തകർത്തു, ഈ നേട്ടത്തോടെ മൈക്രോലൈറ്റ് വിമാനത്തിൽ ഒറ്റയ്ക്ക് പറക്കുന്ന ഏറ്റവും പ്രായം കുറഞ്ഞ വ്യക്തിയും ഏറ്റവും പ്രായം കുറഞ്ഞ സ്ത്രീയുമായി സാറ മാറിയിരുന്നു. മാക്കിന്‍റെ പറക്കലോടെ രണ്ട് ഗിന്നസ് വേൾഡ് റെക്കോർഡുകളാണ് തകർത്തത്. ലോകമെമ്പാടും ഒറ്റയ്ക്ക് പറക്കുന്ന ഏറ്റവും പ്രായം കുറഞ്ഞ വ്യക്തിയും മൈക്രോലൈറ്റ് വിമാനം ലോകമെമ്പാടും പറത്തിയ ഏറ്റവും പ്രായം കുറഞ്ഞ വ്യക്തിയുമായി മാക്ക് മാറി.

വഴിയിലെ പ്രതിസന്ധികള്‍ മറികടന്നാണ് 17 കാരന്‍ ഈ നേട്ടം കൈവരിച്ചത്. മണല്‍ക്കാറ്റുകള്‍ നേരിട്ടും ജനവാസമില്ലാത്ത പസഫിക് ദ്വീപില്‍ രാത്രി കാലങ്ങള്‍ ചിലവഴിച്ചുമാണ് ഈ കൗമാരക്കാരന്‍ യാത്ര പൂര്‍ത്തിയാക്കിയത്. മാതാപിതാക്കള്‍ ബ്രിട്ടീഷുകാരാണെങ്കിലും മാക്ക് റൂഥര്‍ഫോര്‍ഡ് വളര്‍ന്നത് ബെല്‍ജിയത്തിലാണ്.