വീണ്ടും കാട്ടാന ആക്രമണത്തില്‍ ഒരു മരണം. പാലക്കാട് മുണ്ടൂരിലാണ് കാട്ടാന ആക്രമണത്തില്‍ 61 കാരന്‍ മരിച്ചത്. ഞാറക്കോട് സ്വദേശി കുമാരനാണ് വീടിനു സമീപം കൊല്ലപ്പെട്ടത്. പുലര്‍ച്ചെ 3:30 നായിരുന്നു അപകടം. എന്നാല്‍, ഇപ്പോഴും ആന ജനവാസമേഖലയില്‍ തുടരുകയാണെന്നത് പ്രദേശവാസികളെ ഭീതിയിലാഴ്ത്തിയിരിക്കുകയാണ്.
കഴിഞ്ഞ ദിവസങ്ങളായി പ്രദേശത്ത് കാട്ടാന ശല്യം രൂക്ഷമായിരുന്നു. പ്രദേശവാസികളുടെ കൃഷിയടക്കം നശിപ്പിച്ചുക്കൊണ്ടായിരുന്നു കാട്ടാനയുടെ വിഹാരം. അതിനിടയിലാണ് പാലക്കാട് പുതുപരിയാരം പഞ്ചായത്ത് മുണ്ടൂര്‍ ഭാഗത്ത് ഇന്ന് പുലര്‍ച്ചെ ആക്രമണം ഉണ്ടായത്. വീടിന് മുറ്റത്തേക്ക് ഇറങ്ങിയതാണ് കുമാരന്‍. അലക്കു കല്ലിന്റെ ഭാഗത്ത് വെച്ച് കാട്ടാന ആക്രമിക്കുകയായിരുന്നു. ഇപ്പോഴും കാട്ടാന പ്രദേശത്ത് തന്നെ നിലയുറപ്പിച്ചിരിക്കുകയാണ്.
