മൂന്നാറിലെ വിവിധ വില്ലേജുകളിൽ റിസോർട്ടുകൾക്കും ഹോട്ടലുകൾക്കും ഇതര വ്യാപാര സ്ഥാപനങ്ങൾക്കും എൻഒസി പോലും ആവശ്യപ്പെടാതെ വൈദ്യുത കണക്ഷൻ നൽകാൻ ഇറക്കിയ ഉത്തരവ് പുനഃപരിശോധിക്കണമെന്ന് വിഎസ് അച്യുതാനന്ദൻ. വൈദ്യുതി വകുപ്പ് മന്ത്രി എം.എം മണിക്ക് വി.എസ് കത്ത് നൽകി. മൂന്നാർ ദൗത്യകാലത്ത് കയ്യേറ്റ ഭൂമി സർക്കാർ ഏറ്റെടുത്ത നടപടികൾ ശരിയാണെന്ന് കോടതികൾ അംഗീകരിച്ചിരിക്കുകയാണ്. കഴിഞ്ഞ എൽഡിഎഫ് സർക്കാരിന്‍റെ കാലത്ത് തിരിച്ചുപിടിച്ച കയ്യേറ്റങ്ങളും പൊളിച്ചു കളഞ്ഞ നിർമ്മാണങ്ങളുമായി ബന്ധപ്പെട്ട് വിവിധ കോടതികളിൽ നടക്കുന്ന കേസുകളെപ്പോലും ഈ തീരുമാനം പ്രതികൂലമായി ബാധിക്കാനിടയുണ്ടെന്നും ഇത് ഇടതുപക്ഷ നിലപാടിനോട് യോജിക്കുന്നതല്ല എന്നും വിഎസ് കത്തിൽ ചൂണ്ടിക്കാട്ടി.