‘Once a King, Always a King‘- വെറുതെയല്ല ഇങ്ങനൊരു പഴമൊഴി..വിമര്‍ശിച്ചവരെ ഒരു കയ്യകലം മാറ്റിനിര്‍ത്തി ഒരിക്കല്‍ കൂടി ക്രിക്കറ്റിന്റെ രാജാവ് തെളിയിച്ചിരിക്കുകയാണ്. പഴകും തോറും വീര്യം കൂടുന്ന വിരാട് കോഹ്ലലിയെന്ന കിങ്. അതെ…കിങ് ഈസ് ബാക്ക്…. ദക്ഷിണാഫ്രിക്കയ്‌ക്കെതിരായ ആദ്യ ഏകദിനത്തില്‍ വിരാട് കോഹ്ലലി സെഞ്ച്വറി നേടി. 102 പന്തുകളിലാണ് താരം സെഞ്ച്വറി പൂര്‍ത്തിയാക്കിയത്. കരിയറിലെ 52-ാം ഏകദിന സെഞ്ച്വറിയാണിത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയെ രോഹിത്-കോഹ്ലലി കൂട്ടുകെട്ടാണ് മികച്ച സ്‌കോറിലേക്കെത്തിച്ചത്.
റാഞ്ചിയില്‍ നടക്കുന്ന മത്സരത്തില്‍ ടോസ് നേടിയ ദക്ഷിണാഫ്രിക്ക ഇന്ത്യയെ ബാറ്റിങ്ങിന് അയയ്ക്കുകയായിരുന്നു. 18 റണ്‍സെടുത്ത യശസ്വി ജയ്‌സ്വാളിന്റെ വിക്കറ്റാണ് ആദ്യം നഷ്ടമായത്. തുടക്കത്തില്‍ മികച്ച റണ്‍സിലെത്താന്‍ സാധിച്ചില്ലെങ്കിലും പതുക്കെ രോ-കോ കൂട്ടുകെട്ട് ഇന്ത്യയുടെ സ്‌കോര്‍ ഉയര്‍ത്തുകയായിരുന്നു. രോഹിത് ശര്‍മ (57) അര്‍ദ്ധ സെഞ്ച്വറി നേടിയിരുന്നു.
