തൃശ്ശൂര്‍: പോലീസ് തൃശ്ശൂര്‍ പൂരം കലക്കിയത് ബിജെപിക്ക് വേണ്ടിയെന്ന് തൃശ്ശൂരിലെ യുഡിഎഫ് സ്ഥാനാര്‍ത്ഥി കെ.മുരളീധരന്‍. സിപിഎമ്മിന്‍റെ അജണ്ട നടപ്പിലാക്കാന്‍ കമ്മീഷ്ണറെ ഉപയോഗിച്ചതാണെന്ന് അദ്ദേഹം പറഞ്ഞു. സുരേഷ് ഗോപിയാണ് പ്രശ്‌നം പരിഹരിച്ചതെന്ന പ്രചാരണമാണ് ഇപ്പോള്‍ ബിജെപി സൈബര്‍ സെല്‍ ചെയ്യുന്നത്. കമ്മീഷ്ണറെ തല്‍ക്കാലത്തേക്ക് മാറ്റിനിര്‍ത്തുന്നതാണ്, തിരഞ്ഞെടുപ്പ് കഴിയുമ്പോള്‍ വീണ്ടും ഇവിടെത്തന്നെ കൊണ്ടുവരുമെന്നും കമ്മീഷ്ണര്‍ മറ്റ് സമ്മര്‍ദ്ദങ്ങള്‍ക്ക് വഴങ്ങിയോ എന്നറിയാന്‍ ജ്യൂഡീഷ്യല്‍ അന്വേഷണം വേണമെന്നും കെ. മുരളീധരന്‍ പറഞ്ഞു.
കമ്മീഷ്ണർ പൂരം കലക്കാൻ രാവിലെ മുതൽ ശ്രമിച്ചുകൊണ്ടിരുന്നുവെന്നും സംഭവത്തിന് താൻ തന്നെ സാക്ഷിയെന്നും അദ്ദേഹം കൂട്ടിച്ചേർത്തു. സുരേഷ് ഗോപിയെ പൂരത്തിന്‍റെയന്ന് എവിടെയും കണ്ടില്ല, പിന്നീട് സേവാഭാരതിയുടെ ആംബുലൻസിൽ വന്ന് ഷോ കാണിച്ചു. തൃശൂരില്‍ യുഡിഎഫ് തന്നെ ജയിക്കുമെന്ന് കെ മുരളീധരൻ പറഞ്ഞു.