ഇടുക്കി വണ്ടിപ്പെരിയാർ ഗ്രാമ്പി പ്രദേശത്ത് പിടികൂടിയ കടുവ ചത്തുവെന്ന് വനംവകുപ്പ് അധികൃതർ സ്ഥിരീകരിച്ചു. ഗ്രാമവാസികൾക്ക് ഭീഷണിയായി മാറിയ ഈ കടുവയെ പിടികൂടുന്നതിന് വനംവകുപ്പ് പ്രത്യേക ദൗത്യസംഘത്തെ നിയോഗിച്ചിരുന്നു. ഡോ. അനുരാജിന്‍റെ നേതൃത്വത്തിലുള്ള സംഘമാണ് കടുവയെ മയക്കുവെടി ഉപയോഗിച്ച് പിടികൂടാന്‍ ശ്രമിച്ചത്. ആദ്യം വെടിയേറ്റതിനെത്തുടർന്ന് കടുവയ്ക്ക് മയക്കം സംഭവിച്ചെങ്കിലും അത് മതിയായിരുന്നില്ല. രണ്ടാമതും മയക്കുവെടി ഉപയോഗിച്ചപ്പോൾ കടുവ അക്രമാസക്തമായി സംഘത്തിന് നേരെ തിരിഞ്ഞു.
സംഘത്തിലെ ഉദ്യോഗസ്ഥനായ മനുവിനെ കടുവയുടെ ആക്രമണം ഗുരുതരമായി ബാധിച്ചു. മനുവിന്‍റെ തലയിലുണ്ടായിരുന്ന ഹെൽമെറ്റ് കടുവയുടെ അടിയേറ്റ് പൊട്ടി. ഇവരുടെ കയ്യിലുണ്ടായിരുന്ന ഷീൽഡും തകർന്നു. സാഹചര്യത്തിന്‍റെ ഗൗരവം മനസ്സിലാക്കിയ സംഘത്തിലെ അംഗങ്ങൾ സ്വയരക്ഷയ്ക്കായി കടുവയ്ക്ക് നേരെ വെടിയുതിർക്കുകയായിരുന്നു. കടുവയെ പിന്നീട് പെരിയാർ വന്യജീവി സങ്കേതത്തിലെത്തിച്ചെങ്കിലും അതിവേഗം അതിന്‍റെ മരണം സ്ഥിരീകരിക്കുകയായിരുന്നു.
