ന്യൂഡല്‍ഹി: 50 ദിവസമായി സംഘർഷം തുടരുന്ന മണിപ്പൂരില്‍ സമാധാനത്തിന് ആഹ്വാനം ചെയ്ത് കോണ്‍ഗ്രസ് മുന്‍ അധ്യക്ഷ സോണിയാ ഗാന്ധി. രാജ്യത്തിന്‍റെ മനസാക്ഷിയില്‍ ആഴത്തിലുള്ള മുറിവേല്‍പ്പിച്ച അക്രമസംഭവങ്ങളാണ് അരങ്ങേറുന്നത്. കലാപത്തില്‍ ഉറ്റവരെ നഷ്ടമായവരുടെ ദുഃഖത്തില്‍ പങ്കു ചേരുന്നതായും അഗാധമായ അനുശോചനം രേഖപ്പെടുത്തുന്നതായും സോണിയാ ഗാന്ധി പറഞ്ഞു. സമാധാനപരമായി സഹവസിച്ചിരുന്ന നമ്മുടെ സഹോദരങ്ങൾ പരസ്പരം എതിരിടുന്നത് ഹൃദയഭേദകമാണ്. മണിപ്പൂരിലെ ജനങ്ങളോട്, പ്രത്യേകിച്ച് എന്‍റെ ധീരരായ സഹോദരിമാരോട് ഈ മനോഹരമായ ഭൂമിയിൽ സമാധാനവും ഐക്യവും കൊണ്ടുവരാൻ മുന്‍കൈ എടുക്കണമെന്ന് അഭ്യർത്ഥിക്കുന്നതായും സോണിയാ ഗാന്ധി പറഞ്ഞു. മണിപ്പൂരിലെ ജനങ്ങളിൽ അപാരമായ പ്രതീക്ഷയും വിശ്വാസവുമുണ്ടെന്ന് പറഞ്ഞ സോണിയാ ഗാന്ധി ഒറ്റക്കെട്ടായി  ഈ അഗ്നിപരീക്ഷയെ നമ്മള്‍ അതിജീവിക്കുമെന്നും സമാധാനത്തിന് ആഹ്വാനം ചെയ്തുകൊണ്ടുള്ള സന്ദേശത്തില്‍ ആത്മവിശ്വാസം പ്രകടിപ്പിച്ചു.

സോണിയാ ഗാന്ധിയുടെ സന്ദേശം:

മണിപ്പൂരിലെ പ്രിയ സഹോദരീ സഹോദരന്മാരേ,
ഏകദേശം 50 ദിവസമായി മണിപ്പൂരിൽ ഒരു വലിയ മനുഷ്യ ദുരന്തം അരങ്ങേറുന്നതിന് ഞങ്ങൾ സാക്ഷ്യം വഹിച്ചു. നിങ്ങളുടെ സംസ്ഥാനത്തെ ജനങ്ങളുടെ ജീവിതത്തെ തകർക്കുകയും ആയിരക്കണക്കിന് ആളുകളെ പിഴുതെറിയുകയും ചെയ്ത അഭൂതപൂർവമായ അക്രമം നമ്മുടെ രാജ്യത്തിന്‍റെ മനസാക്ഷിയിൽ ആഴത്തിലുള്ള മുറിവാണ് അവശേഷിപ്പിക്കുന്നത്.

ഉറ്റവരെ നഷ്ടപ്പെട്ട എല്ലാവരോടും ഞാൻ അനുശോചനം രേഖപ്പെടുത്തുന്നു. ആളുകൾ സ്വന്തം വീടുകളില്‍ നിന്ന് പലായനം ചെയ്യാൻ നിർബന്ധിതരാകുന്നതും ജീവിതകാലം മുഴുവൻ അവർ നിർമ്മിച്ചതെല്ലാം ഉപേക്ഷിച്ച് ഓടിപ്പോകുന്നതും കാണുമ്പോൾ എനിക്ക് വളരെ സങ്കടമുണ്ട്. സമാധാനപരമായി സഹവസിച്ചിരുന്ന നമ്മുടെ സഹോദരങ്ങൾ പരസ്പരം എതിരിടുന്നത് ഹൃദയഭേദകമാണ്.

മണിപ്പൂരിന്‍റെ ചരിത്രം എല്ലാ വംശങ്ങളിലും മതങ്ങളിലും പശ്ചാത്തലങ്ങളിലും ഉള്ള ആളുകളെയും വൈവിധ്യമാർന്ന സമൂഹത്തിന്‍റെ അസംഖ്യം സാധ്യതകളെയും ഉൾക്കൊള്ളാനുള്ള അവളുടെ കഴിവിന്‍റെ തെളിവാണ്. സാഹോദര്യത്തിന്‍റെ ആത്മാവിനെ പരിപോഷിപ്പിക്കുന്നതിന് അത്യധികമായ വിശ്വാസവും സൽസ്വഭാവവും ആവശ്യമാണ്. അതേസമയം വിദ്വേഷത്തിന്‍റെയും ഭിന്നിപ്പിന്‍റെയും തീജ്വാലകൾ ആളിക്കത്തിക്കാൻ ഒരൊറ്റ തെറ്റായ നടപടി മതി.

ഇന്ന് നമ്മൾ സുപ്രധാനമായ ഒരു വഴിത്തിരിവിലാണ്. സമാധാനത്തിന്‍റെ പാത തിരഞ്ഞെടുക്കുന്നത് നമ്മുടെ കുട്ടികളുടെ ഭാവിയെ മനോഹരമാക്കും. മണിപ്പൂരിലെ ജനങ്ങളോട്, പ്രത്യേകിച്ച് എന്‍റെ ധീരരായ സഹോദരിമാരോട് ഈ മനോഹരമായ ഭൂമിയിൽ സമാധാനവും ഐക്യവും കൊണ്ടുവരാൻ ഞാൻ അഭ്യർത്ഥിക്കുന്നു. ഒരു അമ്മയെന്ന നിലയിൽ നിങ്ങളുടെ വേദന ഞാൻ മനസിലാക്കുന്നു. നിങ്ങളുടെ നല്ല മനസാക്ഷിയോട് വഴി കാണിക്കാൻ ഞാൻ അപേക്ഷിക്കുന്നു. വരും ആഴ്‌ചകളിലും മാസങ്ങളിലും ഞങ്ങൾ വിശ്വാസം പുനഃസ്ഥാപിക്കാനുള്ള ദീർഘമായ യാത്ര ആരംഭിക്കുകയും കൂടുതൽ ശക്തരായി ഈ പരീക്ഷണ ഘട്ടങ്ങളെ അതിജീവിക്കുകയും ചെയ്യുമെന്നത് ഞാന്‍ ആത്മാർത്ഥമായി പ്രതീക്ഷിക്കുന്നു. മണിപ്പൂരിലെ ജനങ്ങളിൽ എനിക്ക് അപാരമായ പ്രതീക്ഷയും വിശ്വാസവുമുണ്ട്. ഒറ്റക്കെട്ടായി നമ്മള്‍ ഈ അഗ്നിപരീക്ഷയെ അതിജീവിക്കും.