തിരുവനന്തപുരം: ശബരിമലയിലെ സ്വര്‍ണ്ണക്കടത്ത് കേസില്‍ മുന്‍ ദേവസ്വം ബോര്‍ഡ് പ്രസിഡന്റ് എന്‍. വാസുവിനെ അന്വേഷണ സംഘം അറസ്റ്റ് ചെയ്തു. കേസില്‍ നേരത്തെ തന്നെ വാസുവിന്റെ പേര് ഉയര്‍ന്നു വന്നിരുന്നെങ്കിലും, വിശദമായ അന്വേഷണങ്ങള്‍ക്കും തെളിവ് ശേഖരണത്തിനും ഒടുവിലാണ് നിര്‍ണ്ണായകമായ ഈ അറസ്റ്റ് രേഖപ്പെടുത്തിയത്.
ചൊവ്വാഴ്ച രാവിലെ വാസുവിന്റെ തിരുവനന്തപുരത്തെ വസതിയില്‍ വെച്ചാണ് അന്വേഷണ ഉദ്യോഗസ്ഥര്‍ അദ്ദേഹത്തെ കസ്റ്റഡിയിലെടുത്തത്. മണിക്കൂറുകളോളം നീണ്ട ചോദ്യം ചെയ്യലിന് ശേഷമാണ് അറസ്റ്റ് രേഖപ്പെടുത്തിയത് എന്നാണ് സൂചന. മുന്‍ ദേവസ്വം ബോര്‍ഡ് പ്രസിഡന്റ്, ദേവസ്വം ബോര്‍ഡ് കമ്മിഷണര്‍ എന്ന നിലയില്‍ സമൂഹത്തില്‍ ഉന്നത സ്വാധീനമുള്ള വ്യക്തിയായ വാസു സിപിഎമ്മുമായി വളരെ അടുപ്പമുള്ള വ്യക്തിയാണ്. ഇദ്ദേഹത്തിന്റെ അറസ്റ്റ് സംസ്ഥാന രാഷ്ട്രീയത്തിലും വലിയ ചര്‍ച്ചകള്‍ക്ക് വഴിയൊരുക്കും. ഭരണകക്ഷിയുമായി അടുത്ത ബന്ധം പുലര്‍ത്തിയിരുന്ന വാസു, ദേവസ്വം ബോര്‍ഡിന്റെ തലപ്പത്ത് ഇരിക്കെ ഇത്തരം ഗുരുതരമായ കുറ്റകൃത്യങ്ങളില്‍ പങ്കാളിയായി എന്നത് ഞെട്ടിക്കുന്ന വിവരമായാണ് പൊതുസമൂഹം കാണുന്നത്.
നിലവില്‍ കസ്റ്റഡിയിലുള്ള വാസുവിനെ കൂടുതല്‍ ചോദ്യം ചെയ്യലിനായി പ്രത്യേക അന്വേഷണ സംഘത്തിന്റെ ഓഫീസിലേക്ക് മാറ്റി. വരും ദിവസങ്ങളില്‍ കേസില്‍ കൂടുതല്‍ അറസ്റ്റുകള്‍ ഉണ്ടാകുമെന്നാണ് അന്വേഷണ സംഘം നല്‍കുന്ന സൂചന. ഈ അറസ്റ്റോടെ സ്വര്‍ണ്ണക്കടത്ത് കേസിന്റെ വ്യാപ്തി വര്‍ദ്ധിക്കുകയും കൂടുതല്‍ ഉന്നതര്‍ കുടുങ്ങാനുള്ള സാധ്യതയും തെളിയുന്നുണ്ട്.
