കൊച്ചി: എറണാകുളം ഞാറയ്ക്കലില്‍ സുഹൃത്തിന്‍റെ വസതിയിൽ നിന്ന് സ്വര്‍ണ്ണാഭരണങ്ങള്‍ മോഷ്ടിച്ച കേസിലെ പ്രതിയായ പോലീസുകാരനെ സര്‍വീസില്‍ നിന്ന് സസ്പെന്‍ഡ് ചെയ്തു. കൊച്ചി എആര്‍ ക്യാമ്പിലെ പോലീസ് ഉദ്യോഗസ്ഥനായ അമല്‍ദേവിനെയാണ് എറണാകുളം ഡിസിപി സസ്പെന്‍ഡ് ചെയ്തത്. സുഹൃത്തിന്‍റെ വീട്ടില്‍ നിന്ന് പത്ത് പവന്‍ സ്വര്‍ണ്ണാഭരണങ്ങള്‍ മോഷ്ടിച്ച കേസില്‍ അറസ്റ്റിലായ അമല്‍ദേവ് ഇപ്പോള്‍ റിമാന്‍ഡിലാണ്. ഇയാള്‍ക്കെതിരെ നേരത്തയും അച്ചടക്ക നടപടി ഉണ്ടായിരുന്നു. ഞാറയ്ക്കല്‍ സ്വദേശി നടേശന്‍റെ വീട്ടില്‍ നിന്ന് മകന്‍റെ ഭാര്യയുടെ സ്വര്‍ണ്ണമാണ് ഇയാള്‍ മോഷ്ടിച്ചത്. സംഭവത്തില്‍ നടേശന്‍ പരാതി നല്‍കിയതിനെ തുടര്‍ന്നാണ് അമല്‍ദേവിനെ പോലീസ് അറസ്റ്റ് ചെയ്തത്. താന്‍ മോഷണം നടത്തിയതായി അമല്‍ദേവ് പോലീസിനോട് കുറ്റസമ്മതം നടത്തിയിരുന്നു. സ്വര്‍ണ്ണം ഇയാളില്‍ നിന്ന് വീണ്ടെടുത്തിരുന്നു.