പത്തനംതിട്ട: തിരഞ്ഞെടുപ്പ് പ്രചാരണത്തിന്റെ ഭാഗമായി ‘പോറ്റിയെ കേറ്റിയേ’ എന്ന പാരഡി ഗാനം ഇനിയും പാടുമെന്ന് റാന്നിയിലെ യു.ഡി.എഫ് സ്ഥാനാര്ത്ഥി അഡ്വ. പഴകുളം മധു. ഗാനത്തിനെതിരെ പ്രസാദ് കുഴിക്കാല തിരഞ്ഞെടുപ്പ് കമ്മീഷന് പരാതി നല്കിയ വാര്ത്തയോട് പ്രതികരിക്കുകയായിരുന്നു അദ്ദേഹം. തിരഞ്ഞെടുപ്പില് നേരിടാന് പോകുന്ന തിരിച്ചടിയില് നിരാശരായ ഇടത് മുന്നണിയുടെ ഗൂഢതന്ത്രമാണ് ഈ പരാതിക്ക് പിന്നിലെന്ന് അദ്ദേഹം പറഞ്ഞു.
സി.പി.എം നിര്ദ്ദേശപ്രകാരമാണ് പ്രസാദ് കുഴിക്കാല പരാതി നല്കിയിരിക്കുന്നത്. പത്തനംതിട്ടയില് പ്രാക്ടീസ് ചെയ്യുന്ന അഭിഭാഷകനായ തനിക്ക് തിരഞ്ഞെടുപ്പ് ചട്ടങ്ങളെക്കുറിച്ചും നിയമത്തെക്കുറിച്ചും കൃത്യമായ ബോധ്യമുണ്ടെന്ന് പഴകുളം മധു വ്യക്തമാക്കി. ശബരിമലയിലെ സ്വര്ണ്ണക്കൊള്ള തിരഞ്ഞെടുപ്പിലെ പ്രധാന ചര്ച്ചാവിഷയമാണ്. റാന്നിയില് സി.പി.എം – ബി.ജെ.പി സഖ്യമുണ്ടാക്കാനുള്ള നീക്കം ജനങ്ങള് തള്ളിയതോടെ ഇടത് മുന്നണിക്ക് കാലിടറി തുടങ്ങിയിരിക്കുകയാണ്.
ശബരിമല പ്രക്ഷോഭത്തിന് ആദ്യം ആഹ്വാനം നല്കിയത് താനാണ്. നാമജപ പ്രക്ഷോഭത്തില് പങ്കെടുത്തവര്ക്കെതിരെ എടുത്ത കള്ളക്കേസുകള് യു.ഡി.എഫ് സര്ക്കാര് അധികാരത്തില് വരുമ്പോള് രാഷ്ട്രീയ ഭേദമില്ലാതെ പിന്വലിക്കാന് മുന്കൈ എടുക്കുമെന്നും അദ്ദേഹം പത്തനംതിട്ടയില് മാധ്യമങ്ങളോട് പറഞ്ഞു.
