കോട്ടയം മെഡിക്കല്‍ കോളേജില്‍ ചികിത്സയിലിരിക്കെ വീട്ടമ്മ മരിച്ച സംഭവത്തില്‍ ചികിത്സാ പിഴവുണ്ടായതായി ബന്ധുക്കളുടെ പരാതി. ഗൈനക്കോളജി വിഭാഗത്തില്‍ ചികിത്സയ്ക്കായി എത്തിയ കോതനല്ലൂര്‍ സ്വദേശിനിയായ ശാലിനിയാണ് ഇന്ന് പുലര്‍ച്ചെ മരണപ്പെട്ടത്. ഗര്‍ഭാശയ സംബന്ധമായ പ്രശ്‌നങ്ങളെ തുടര്‍ന്നാണ് ശാലിനി ആശുപത്രിയില്‍ എത്തിയതെന്നും, മറ്റ് ഗുരുതരമായ ആരോഗ്യപ്രശ്‌നങ്ങളൊന്നും അവര്‍ക്ക് ഉണ്ടായിരുന്നില്ലെന്നുമാണ് ബന്ധുക്കള്‍ വ്യക്തമാക്കുന്നത്.
ബന്ധുക്കളുടെ പരാതി പ്രകാരം, മെഡിക്കല്‍ കോളേജില്‍ നിന്നും മരുന്ന് നല്‍കിയതിന് തൊട്ടുപിന്നാലെയാണ് ശാലിനിയുടെ നില ഗുരുതരമായതും തുടര്‍ന്ന് മരണം സംഭവിച്ചതും. ചികിത്സാ പിഴവാണ് മരണകാരണമെന്ന് ആരോപിച്ചുകൊണ്ട് ഇവര്‍ പരാതി നല്‍കിയിട്ടുണ്ട്.
സംഭവത്തില്‍ ഗാന്ധിനഗര്‍ പോലീസ് പ്രാഥമിക പരിശോധനകള്‍ ആരംഭിച്ചു. ശാലിനിയുടെ മരണത്തിന്റെ യഥാര്‍ത്ഥ കാരണം കണ്ടെത്താന്‍ വിശദമായ പോസ്റ്റ്മോര്‍ട്ടം റിപ്പോര്‍ട്ടിനായി കാത്തിരിക്കുകയാണ് പോലീസ്. റിപ്പോര്‍ട്ട് ലഭിച്ചതിന് ശേഷം തുടര്‍നടപടികള്‍ സ്വീകരിക്കാനാണ് അധികൃതരുടെ തീരുമാനം.
