ന്യൂഡല്‍ഹി: പാകിസ്ഥാനിലെ ഭീകരകേന്ദ്രങ്ങളില്‍ ഇന്ത്യ നടത്തിയ ‘ഓപ്പറേഷന്‍ സിന്ദൂര്‍’ ആക്രമണം കൃത്യതയാര്‍ന്നതും വലിയ പ്രത്യാഘാതങ്ങള്‍ സൃഷ്ടിക്കുന്നതുമായിരുന്നു. റഫാല്‍ യുദ്ധവിമാനങ്ങളില്‍ ഘടിപ്പിച്ച സ്‌കാല്‍പ് ക്രൂയിസ് മിസൈലുകളും ഹാമര്‍ പ്രിസിഷന്‍-ഗൈഡഡ് ആയുധങ്ങളുമായിരുന്നു ഇന്ത്യയുടെ പ്രധാന തിരഞ്ഞെടുപ്പെന്ന് സൈനിക വൃത്തങ്ങള്‍ അറിയിച്ചു.
അര്‍ദ്ധരാത്രിക്ക് തൊട്ടുപിന്നാലെ, ജെയ്ഷെ-മുഹമ്മദിന്റെയും ലഷ്‌കര്‍-ഇ-ത്വയ്ബയുടെയും ശക്തികേന്ദ്രങ്ങളായ ബഹവല്‍പൂര്‍, മുറിദ്കെ എന്നിവയുള്‍പ്പെടെ പാകിസ്ഥാനിലെ ഒന്‍പത് സ്ഥലങ്ങളില്‍ മിസൈലുകള്‍ വര്‍ഷിച്ചു. 25 വിനോദസഞ്ചാരികളും ഒരു പ്രദേശവാസിയും കൊല്ലപ്പെട്ട പഹല്‍ഗാമിലെ ഭീകരാക്രമണത്തിന് പ്രതികാരമായാണ് വ്യോമസേന, നാവികസേന, കരസേന എന്നിവ സംയുക്തമായി ഈ ഓപ്പറേഷന്‍ നടത്തിയത്.
സ്‌കാല്‍പ് (SCALP) / സ്റ്റോം ഷാഡോ (STORM SHA-DOW)
‘സ്റ്റോം ഷാഡോ’ എന്നും അറിയപ്പെടുന്ന സ്‌കാല്‍പ്, ദീര്‍ഘദൂര ലക്ഷ്യസ്ഥാനങ്ങളില്‍ ആഴത്തിലുള്ള ആക്രമണങ്ങള്‍ക്കായി രൂപകല്‍പ്പന ചെയ്ത, സ്റ്റെല്‍ത്ത് സവിശേഷതകളുള്ള ഒരു എയര്‍-ലോഞ്ച്ഡ് ക്രൂയിസ് മിസൈലാണ്. രാത്രിയിലും എല്ലാ കാലാവസ്ഥയിലും പ്രവര്‍ത്തിക്കാന്‍ കഴിയുമെന്നതാണ് ലോകമെമ്പാടുമുള്ള പ്രതിരോധ സേനകള്‍ക്കിടയില്‍ ഇതിനെ പ്രിയങ്കരമാക്കുന്നത്.
ഓപ്പറേഷന്‍ സിന്ദൂറിനായി സ്‌കാല്‍പ് ക്രൂയിസ് മിസൈലുകളും ഹാമര്‍ പ്രിസിഷന്‍-ഗൈഡഡ് ആയുധങ്ങളും തിരഞ്ഞെടുത്തത്, പ്രത്യേക ഭീകര താവളങ്ങള്‍ മാത്രം ലക്ഷ്യമിടാനും സാധാരണക്കാര്‍ക്ക് നാശനഷ്ടം ഒഴിവാക്കാനുമുള്ള ഇന്ത്യയുടെ തന്ത്രപരമായ നീക്കത്തെയാണ് സൂചിപ്പിക്കുന്നത്. ഇത്തവണ, റഫാല്‍ വിമാനങ്ങള്‍ ഇന്ത്യന്‍ ആയുധശേഖരത്തിന് കരുത്തേകി. 2019-ലെ ബാലാക്കോട്ട് വ്യോമാക്രമണത്തില്‍, ഭീകരരുടെ ലോഞ്ച്പാഡുകള്‍ ആക്രമിക്കാന്‍ ഇന്ത്യ കാലഹരണപ്പെട്ട മിറാഷ് 2000 വിമാനങ്ങളാണ് ഉപയോഗിച്ചിരുന്നത്.
450 കിലോമീറ്റര്‍ ദൂരപരിധിയുള്ള സ്‌കാല്‍പ് മിസൈലിന്റെ കൃത്യതയ്ക്ക് കാരണം INS (ഇനേര്‍ഷ്യല്‍ നാവിഗേഷന്‍ സിസ്റ്റം), GPS (ഗ്ലോബല്‍ പൊസിഷനിങ് സിസ്റ്റം), ഭൂപ്രദേശത്തെക്കുറിച്ചുള്ള വിവരങ്ങള്‍ (terrain referencing) എന്നിവ ഉപയോഗിക്കുന്ന നൂതന നാവിഗേഷന്‍ സംവിധാനമാണ്. യൂറോപ്യന്‍ കണ്‍സോര്‍ഷ്യമായ MBDA ആണ് ഈ മിസൈലിന്റെ നിര്‍മ്മാതാക്കള്‍. കഠിനമായ ബങ്കറുകളും വെടിമരുന്ന് സംഭരണശാലകളും തകര്‍ക്കാന്‍ ഇത് അനുയോജ്യമായ ആയുധമായി കണക്കാക്കപ്പെടുന്നു. കഴിഞ്ഞ വര്‍ഷം റഷ്യയ്ക്കുള്ളിലെ ലക്ഷ്യസ്ഥാനങ്ങളില്‍ ആക്രമണം നടത്താന്‍ ഉക്രെയ്ന്‍ ഇതേ മിസൈല്‍ ഉപയോഗിച്ചിരുന്നു.
ലക്ഷ്യത്തിനടുത്തെത്തുമ്പോള്‍, മിസൈലിലെ ഇന്‍ഫ്രാറെഡ് സീക്കര്‍, അതിലേക്ക് നല്‍കിയിട്ടുള്ള ലക്ഷ്യത്തിന്റെ ചിത്രവുമായി ഒത്തുനോക്കി കൃത്യത ഉറപ്പാക്കുകയും ചുറ്റുമുള്ള പ്രദേശങ്ങളിലെ നാശനഷ്ടം കുറയ്ക്കുകയും ചെയ്യുന്നു. 450 കിലോഗ്രാം ഭാരമുള്ള പോര്‍മുന വഹിക്കാന്‍ കഴിയുന്ന ഈ മിസൈല്‍, വിമാനത്തില്‍ നിന്ന് തൊടുത്ത ശേഷം താഴ്ന്നു പറക്കുന്നതിനാല്‍ കണ്ടെത്താന്‍ പ്രയാസമാണ്.
ഹാമര്‍ (HAMMER) എയര്‍-ടു-ഗ്രൗണ്ട് ബോംബ്
ഓപ്പറേഷനില്‍ ഉപയോഗിച്ച മറ്റൊരു ആയുധമായ ഹാമര്‍ (ഹൈലി അജൈല്‍ മൊഡ്യുലാര്‍ മ്യൂണിഷന്‍ എക്സ്റ്റന്‍ഡഡ് റേഞ്ച്), എല്ലാ കാലാവസ്ഥയിലും ഉപയോഗിക്കാവുന്ന എയര്‍-ടു-ഗ്രൗണ്ട് പ്രിസിഷന്‍-ഗൈഡഡ് ആയുധമാണ്. ‘ഗ്ലൈഡ് ബോംബ്’ എന്നും അറിയപ്പെടുന്ന ഇതിന് 70 കിലോമീറ്റര്‍ വരെ ദൂരപരിധിയുണ്ട്. ഇത് സാധാരണ ബോംബുകളില്‍ (250kg, 500kg, 1,000kg) ഘടിപ്പിക്കാന്‍ സാധിക്കും.
ഫ്രഞ്ച് കമ്പനിയായ സഫ്രാന്‍ നിര്‍മ്മിക്കുന്ന ഈ ബോംബ്, ജാമിംഗിനെ പ്രതിരോധിക്കാന്‍ ശേഷിയുള്ളതാണ്. ദുര്‍ഘടമായ ഭൂപ്രദേശങ്ങളില്‍ താഴ്ന്ന ഉയരത്തില്‍ നിന്ന് വിക്ഷേപിക്കാന്‍ കഴിയും. തടസ്സപ്പെടുത്താന്‍ പ്രയാസമുള്ളതും ഉറപ്പുള്ള നിര്‍മ്മിതികളെ തുളച്ചുകയറാന്‍ കഴിവുള്ളതുമാണ് ഇതിനെ ഇത്രയധികം ഫലപ്രദമാക്കുന്നത്.
ഇക്കാരണത്താലാണ് പുല്‍വാമ, പഹല്‍ഗാം ഭീകരാക്രമണങ്ങള്‍ക്ക് പിന്നില്‍ പ്രവര്‍ത്തിച്ച ജെയ്ഷെ, ലഷ്‌കര്‍ ഭീകരസംഘടനകളുടെ ആസ്ഥാനങ്ങള്‍ തകര്‍ത്ത് പാകിസ്ഥാനിലെ ഭീകര ശൃംഖലയ്ക്ക് കനത്ത നാശനഷ്ടം വരുത്താന്‍ ഇന്ത്യയ്ക്ക് കഴിഞ്ഞത്.
