വയനാട്: മാനന്തവാടിയില്‍ ജനവാസമേഖലയില്‍ ഇറങ്ങി ആളെ കൊന്ന കാട്ടാനയെ പിടികൂടുന്നതിനുള്ള മണ്ണുണ്ടി ഭാഗത്തെ ദൗത്യം അവസാനിപ്പിച്ചു. കാട്ടാന ബേലൂര്‍ മഗ്നയെ ഇന്ന് മയക്കുവെടി വെക്കില്ല. ദൗത്യം തൽക്കാലം ഉപേക്ഷിച്ചതായി ഉദ്യോഗസ്ഥർ അറിയിച്ചു. ആന കർണാടക അതിർത്തിയിലെ കൊടുങ്കാട്ടിലാണ് ഇപ്പോഴുള്ളതെന്നാണ് ലഭിക്കുന്ന വിവരം. സ്ഥലത്ത് നിന്ന് മടങ്ങാന്‍ തുടങ്ങിയ വനംവകുപ്പ് ഉദ്യോഗസ്ഥരെ നാട്ടുകാര്‍ തടഞ്ഞു. തുടർന്ന് പ്രദേശത്ത് സംഘര്‍ഷ സാധ്യത നിലനില്‍ക്കുകയാണ്.
ട്രാക്കിംഗ് തടസ്സപ്പെട്ടതോടെയാണ് ദൗത്യം അവസാനിപ്പിച്ചത്. ചെമ്പകപ്പാറ ഭാഗത്തുനിന്ന് ആന മണ്ണുണ്ടി ഭാഗത്തേക്ക് നീങ്ങിയിരുന്നു. ദൗത്യസംഘം അരികിലെത്തിയപ്പോഴാണ് ആന സ്ഥാനം മാറിയത്. ട്രാക്ക് ചെയ്യാൻ കഴിയാതെ വന്നതോടെ ദൗത്യം സങ്കീർണമായതായാണ് സൂചന.