ഇന്ത്യക്കെതിരായ രണ്ടാം ഏകദിനത്തില് ന്യൂസിലന്ഡിന് ഏഴ് വിക്കറ്റ് വിജയം. ഡാരല് മിച്ചലിന്റെ തകര്പ്പന് സെഞ്ചുറിയാണ് കിവീസിന് കരുത്തായത്. ഇതോടെ മൂന്ന് മത്സരങ്ങളടങ്ങിയ പരമ്പരയില് ന്യൂസിലന്ഡ് ഒപ്പമെത്തി.
ആദ്യം ബാറ്റിംഗിനിറങ്ങിയ ഇന്ത്യക്ക് കെ.എല് രാഹുലിന്റെ സെഞ്ചുറിയും ക്യാപ്റ്റന് ശുഭ്മാന് ഗില്ലിന്റെ അര്ധസെഞ്ചുറിയുമാണ് തുണയായത്. രോഹിത് ശര്മയും വിരാട് കോലിയും അടക്കമുള്ളവര് നിരാശപ്പെടുത്തിയപ്പോള്, 92 പന്തില് 112 റണ്സുമായി രാഹുല് പുറത്താകാതെ നിന്ന് ഇന്ത്യയെ ഭേദപ്പെട്ട നിലയിലെത്തിച്ചു. 50 ഓവറില് 7 വിക്കറ്റിന് 284 റണ്സാണ് ഇന്ത്യ നേടിയത്. ന്യൂസിലന്ഡിനായി മൂന്ന് വിക്കറ്റുമായി ക്രിസ്റ്റ്യന് ക്ലാര്ക്ക് ഇന്ത്യന് ബാറ്റിംഗ് നിരയെ വിറപ്പിച്ചു.
മറുപടി ബാറ്റിംഗിനിറങ്ങിയ ന്യൂസിലന്ഡിന് തുടക്കത്തില് തന്നെ ഓപ്പണര്മാരെ നഷ്ടമായി. എന്നാല് പിന്നീട് കണ്ടത് ഡാരല് മിച്ചലിന്റെയും വില് യങ്ങിന്റെയും ക്ലാസിക് പ്രകടനമാണ്. ഇന്ത്യന് ബൗളര്മാരെ നിഷ്പ്രഭരാക്കിയ ഈ സഖ്യം മൂന്നാം വിക്കറ്റില് 162 റണ്സാണ് അടിച്ചുകൂട്ടിയത്. വില് യങ് 87 റണ്സെടുത്ത് പുറത്തായെങ്കിലും, 131 റണ്സുമായി മിച്ചല് ക്രീസില് ഉറച്ചുനിന്നു. ഒടുവില് ഗ്ലെന് ഫിലിപ്സിനെ സാക്ഷിയാക്കി 47.3 ഓവറില് കിവീസ് വിജയലക്ഷ്യം കണ്ടു.
ഇന്ത്യയ്ക്കായി പ്രസിദ്ധ് കൃഷ്ണയും കുല്ദീപ് യാദവും ഹര്ഷിത് റാണയും ഓരോ വിക്കറ്റുകള് വീഴ്ത്തിയെങ്കിലും കിവീസ് ബാറ്റിംഗ് നിരയെ തടയാനായില്ല. ഇതോടെ പരമ്പരയിലെ അവസാന മത്സരം ഇരു ടീമുകള്ക്കും നിര്ണായകമാകും. ജനുവരി 18-ന് ഇന്ഡോറിലാണ് നിര്ണായകമായ പോരാട്ടം.
