ന്യൂ ദൽഹി: കോൺഗ്രസ് പ്രവർത്തകസമിതി അംഗം എ കെ ആന്‍റണി മധ്യപ്രദേശിലെ കോൺഗ്രസ് കേന്ദ്ര നിരീക്ഷകനാകും. നാളെ തന്നെ അദ്ദേഹം ഭോപ്പാലിലേക്ക് പുറപ്പെടും. . ചത്തീസ്ഗഡിൽ മല്ലികാർജ്ജുൻ ഖാർഗെ, രാജസ്ഥാനിൽ കെസി വേണുഗോപാൽ എന്നിവരാണ് കോൺഗ്രസിന്‍റെ കേന്ദ്ര നിരീക്ഷകർ. എസ് പിയും ബി എസ് പിയും കോൺഗ്രസിന് മധ്യപ്രദേശിൽ പിന്തുണ അറിയിച്ചിട്ടുണ്ട്. ഈ സാഹചര്യത്തിലാണ് എ കെ ആന്‍റണി നിരീക്ഷകനായി എത്തുന്നത്.
രാജ്യത്ത് ബി ജെ പിയുടെ പതനം തുടങ്ങിയെന്ന് ആന്‍റണി പ്രതികരിച്ചു. തെരഞ്ഞെടുപ്പ് ഫലം ബി ജെ പിയുടെ പതനത്തിന്‍റെ തുടക്കമാണ്. തിരിച്ചുവരവിന്‍റെ പാതയിലാണ് കോൺഗ്രസ് എന്നും വർഗീയ ശക്തികൾക്കുള്ള താക്കീതാണ് തെരഞ്ഞെടുപ്പു ഫലമെന്നും അദ്ദേഹം പറഞ്ഞു.
