കോട്ടയം: ഗാനരചയിതാവും കവിയുമായ  ബീയാർ പ്രസാദ് അന്തരിച്ചു. 61 വയസ്സ് ആയിരുന്നു. ടിവി ചാനൽ പരിപാടികളുടെ അവതരണ മികവുകൊണ്ട് ജനശ്രദ്ധയാകർഷിച്ച വ്യക്തിത്വമായിരുന്നു അദ്ദേഹം.

കുട്ടനാട്ടിലെ മങ്കൊമ്പ് എന്ന ഗ്രാമത്തിലാണ് ബിയാർ പ്രസാദ് ജനിച്ചത് . യഥാർത്ഥ പേര് ബി രാജേന്ദ്രപ്രസാദ് എന്നാണ്. 2003 -ൽ പ്രിയദർശൻ സംവിധാനം ചെയ്ത് വിദ്യാസാഗർ സംഗീതം നൽകിയ കിളിച്ചുണ്ടൻ മാമ്പഴത്തിലൂടെയാണ് അദ്ദേഹം മലയാള സിനിമയിൽ അരങ്ങേറ്റം കുറിച്ചത് .  ജലോത്സവം, വെട്ടം, തട്ടുംപുറത്ത് അച്യുതൻ എന്നിവയുൾപ്പെടെ നിരവധി സിനിമകൾക്ക് ബീയാർ പ്രസാദ് ഗാനരചന നിർവഹിച്ചു. സിനിമകൾ കൂടാതെ സംഗീത ആൽബങ്ങൾക്കും അദ്ദേഹം രചന നിർവഹിച്ചിട്ടുണ്ട്.

മലയാളത്തിൽ ബിഎ സാഹിത്യം പൂർത്തിയാക്കിയ ബഹുമുഖ പ്രതിഭ കൂടിയാണ് അദ്ദേഹം. കഥകളി നൃത്തത്തിനായി നിരവധി ലിബ്രെറ്റോകൾ എഴുതിയിട്ടുണ്ട്. 1993-ൽ  തിരക്കഥയെഴുതിയ ജോണി എന്ന ചിത്രത്തിന് മികച്ച കുട്ടികളുടെ ചിത്രത്തിനുള്ള കേരള സംസ്ഥാന അവാർഡ് ലഭിച്ചു. നിരവധി ടെലിവിഷൻ ചാനലുകളിൽ അവതാരകനായും അദ്ദേഹം പ്രവർത്തിച്ചിട്ടുണ്ട്.