തിരുവനന്തപുരം: ശനിയാഴ്ചകളിൽ സ്കൂളുകൾക്ക് പ്രവൃത്തിദിനമാക്കിയ തീരുമാനം വിദ്യാഭ്യാസ വകുപ്പ് മരവിപ്പിച്ചു. ഹൈക്കോടതി വിധി പ്രകാരം പൊതുവിദ്യാഭ്യാസ ഡയറക്ടറാണ് പുതുക്കിയ സർക്കുലർ പുറത്തിറക്കിയത്. ഹൈക്കോടതി വിധിയുടെ പശ്ചാത്തലത്തിൽ സർക്കാർ അന്തിമതീരുമാനം എടുക്കുന്നത് വരെ ശനിയാഴ്ചകളിൽ ഇനി ക്ലാസ് ഉണ്ടാകില്ല. അധ്യാപക സംഘടനകൾ ഉൾപ്പെടെ വിവിധ വിഭാഗങ്ങളുമായി ചർച്ചകൾ നടത്തിയതിനു ശേഷമായിരിക്കും സർക്കാർ തീരുമാനമുണ്ടാവുക. ഉടൻ തന്നെ ഈ ചർച്ചകളുണ്ടായേക്കും. അധ്യാപകസംഘടനകൾ നൽകിയ ഹർജിയിലാണ് ഹൈക്കോടതി ചർച്ച നടത്തുവാൻ നിർദ്ദേശിച്ചത്.
