നിയമസഭയിലെ ചോദ്യങ്ങള്‍ക്ക് മറുപടി നല്‍കുന്നതില്‍ ധനമന്ത്രി കെ.എന്‍. ബാലഗോപാല്‍ വീഴ്ച വരുത്തുന്നത് പതിവായിരിക്കുകയാണ്. നിയമസഭയുടെ ചട്ടങ്ങള്‍ ലംഘിച്ചുകൊണ്ട്, കഴിഞ്ഞ നിയമസഭാ സമ്മേളനത്തിലെ 86 ചോദ്യങ്ങള്‍ക്കാണ് ഇതുവരെ മന്ത്രി മറുപടി നല്‍കാത്തതെന്നാണ് കണക്ക്. ചോദ്യങ്ങള്‍ക്ക് തലേദിവസം വൈകുന്നേരം 5 മണിക്ക് മുന്‍പ് മറുപടി നല്‍കണമെന്ന നിയമം മന്ത്രി പാലിക്കുന്നില്ലെന്നും സ്പീക്കറുടെ നിരവധി റൂളിംഗുകള്‍ക്ക് ഇത് കാരണമായിട്ടുണ്ടെന്നും റിപ്പോര്‍ട്ടുകള്‍ സൂചിപ്പിക്കുന്നു.
സര്‍ക്കാര്‍ ജീവനക്കാരുടെ ക്ഷാമബത്ത, സംസ്ഥാനത്തെ വിലക്കയറ്റം, കിഫ്ബി വായ്പകള്‍, കേന്ദ്ര സര്‍ക്കാരിന്റെ വിവേചനം, ജി.എസ്.ടി., നികുതി പിരിവ്, ക്ഷേമ പെന്‍ഷന്‍ തുടങ്ങിയ സുപ്രധാന വിഷയങ്ങളിലാണ് മന്ത്രി മറുപടി നല്‍കാന്‍ മടിക്കുന്നത്. ഈ വിഷയങ്ങളിലെ ധനമന്ത്രിയുടെ മൗനം സര്‍ക്കാരിന്റെ സുതാര്യതയെക്കുറിച്ചുള്ള സംശയങ്ങള്‍ വര്‍ദ്ധിപ്പിക്കുന്നു. ഇന്ന് നിയമസഭാ സമ്മേളനം ആരംഭിക്കുമ്പോള്‍ ഈ വിഷയങ്ങള്‍ വീണ്ടും ചര്‍ച്ചയാകാന്‍ സാധ്യതയുണ്ട്.
