ശബരിമല ദര്ശനത്തിന് എത്തുന്നവര് കൊവിഡ് നെഗറ്റീവ് സര്ട്ടിഫിക്കറ്റ് കരുതണമെന്ന് സംസ്ഥാന പൊലീസ് മേധാവി ലോകനാഥ് ബെഹ്റ വ്യക്തമാക്കി. ദര്ശനത്തിന് എത്തുന്നവര് 48 മണിക്കൂറിനകം ലഭ്യമായ കൊവിഡ് നെഗറ്റീവ് സര്ട്ടിഫിക്കറ്റ് കരുതണമെന്നും, മലകയറാന് പ്രാപ്തരാണെന്ന് സാക്ഷ്യപ്പെടുത്തിയ മെഡിക്കല് ഫിറ്റ്നസ് സര്ട്ടിഫിക്കറ്റ് കൂടെ കരുതണമെന്നുമാണ് ഡി.ജി.പി അറിയിച്ചത്.
ഭക്തര് ആചാരപ്രകാരമുള്ള സാധനങ്ങള് കൂടാതെ പരമാവധി കുറച്ചു സാധനങ്ങള് മാത്രമേ കൊണ്ടുവരാവൂ എന്നും സാനിറ്റൈസര്, കൈയ്യുറകള് എന്നിവ നിര്ബന്ധമായും കൊണ്ടുവരികയും ഉപയോഗിക്കുകയും വേണമെന്നും അദ്ദേഹം വ്യക്തമാക്കി. നല്ല ഗുണനിലവാരമുള്ളതും വീണ്ടും ഉപയോഗിക്കാവുന്നതുമായ മാസ്കുകള് കരുതണം. ഭക്തർ സാമൂഹിക അകലം പാലിക്കണം. കൂട്ടമായി നടക്കാനോ മല കയറാനോ പാടില്ലെന്നും പൊലീസ് മേധാവി പുറത്തിറക്കിയ പത്രക്കുറിപ്പിൽ അറിയിച്ചു