2026-ലെ ട്വന്റി-20 ലോകകപ്പില് നിന്ന് ബംഗ്ലാദേശ് പിന്മാറി. ഇന്ത്യയില് നടക്കേണ്ട തങ്ങളുടെ ഗ്രൂപ്പ് ഘട്ട മത്സരങ്ങള് ശ്രീലങ്കയിലേക്ക് മാറ്റണമെന്ന ബംഗ്ലാദേശിന്റെ ആവശ്യം അന്താരാഷ്ട്ര ക്രിക്കറ്റ് കൗണ്സില് (ഐസിസി) തള്ളിയതിനെത്തുടര്ന്നാണ് ഈ നാടകീയ നീക്കം. ബുധനാഴ്ച (ജനുവരി 21) നടന്ന ഐസിസി യോഗത്തില് വോട്ടിംഗിലൂടെ ബംഗ്ലാദേശിന്റെ ആവശ്യം തള്ളുകയായിരുന്നു. ഇതോടെ ടൂര്ണമെന്റില് നിന്ന് ടീമിനെ നീക്കം ചെയ്യാനും പകരം മറ്റൊരു ടീമിനെ ഉള്പ്പെടുത്താനും ഐസിസി തീരുമാനിച്ചു.
ലിറ്റണ് ദാസിന്റെ നേതൃത്വത്തിലുള്ള ബംഗ്ലാദേശ് ടീമിന് കൊല്ക്കത്തയില് മൂന്നും മുംബൈയില് ഒന്നും മത്സരങ്ങളായിരുന്നു നിശ്ചയിച്ചിരുന്നത്. എന്നാല് രാഷ്ട്രീയ-സുരക്ഷാ കാരണങ്ങള് ചൂണ്ടിക്കാട്ടി ഇന്ത്യയില് കളിക്കാന് ബംഗ്ലാദേശ് സര്ക്കാര് അനുമതി നല്കാത്തതാണ് പ്രതിസന്ധിക്ക് കാരണമായത്. ഐസിസിയില് നിന്ന് അനുകൂലമായ തീരുമാനം ഉണ്ടാകാത്ത പശ്ചാത്തലത്തിലാണ് ടീമിനെ പിന്വലിക്കാന് ബംഗ്ലാദേശ് ക്രിക്കറ്റ് ബോര്ഡ് തീരുമാനിച്ചത്.
ബംഗ്ലാദേശിന് പകരം സ്കോട്ട്ലന്ഡ് ലോകകപ്പില് കളിക്കുമെന്ന് ഏകദേശം ഉറപ്പായിട്ടുണ്ട്. 20 ടീമുകള് പങ്കെടുക്കുന്ന ടൂര്ണമെന്റിലേക്ക് യോഗ്യത നേടാത്ത ടീമുകളില് റാങ്കിംഗില് ഏറ്റവും മുന്നിലുള്ളത് സ്കോട്ട്ലന്ഡ് ആയതിനാലാണ് അവര്ക്ക് നറുക്കുവീണത്. ഫെബ്രുവരി 7 മുതല് മാര്ച്ച് 8 വരെ ഇന്ത്യയില് വെച്ചാണ് ലോകകപ്പ് അരങ്ങേറുന്നത്. ബംഗ്ലാദേശിന്റെ പിന്മാറ്റം ടൂര്ണമെന്റിന്റെ ആവേശത്തിന് ചെറിയ തിരിച്ചടിയാണെങ്കിലും സ്കോട്ട്ലന്ഡിന്റെ വരവ് മറ്റൊരു ചരിത്രമായി മാറും.
