കൊവിഡ് പ്രതിസന്ധിയില്‍ വലയുന്ന ജനങ്ങളെ സഹായിക്കുന്നതിനു പകരം ഇന്ധനവില വര്‍ധിപ്പിച്ച് ദ്രോഹിക്കുന്നു; കേന്ദ്രനടപടി ക്രൂരതയെന്ന് എ.കെ ആന്‍റണി

Jaihind News Bureau
Monday, June 29, 2020

 

കൊവിഡ് പ്രതിസന്ധിയെ തുടര്‍ന്ന് ദുരിതമനുഭവിക്കുന്ന ജനങ്ങളെ സഹായിക്കുന്നതിനുപകരം തുടര്‍ച്ചയായി ഇന്ധനവില വര്‍ധിപ്പിച്ച് ദ്രോഹിക്കുകയാണ് കേന്ദ്രസര്‍ക്കാര്‍ ചെയ്യുന്നതെന്ന് കോണ്‍ഗ്രസ് പ്രവര്‍ത്തകസമിതി അംഗം എ.കെ ആന്‍റണി. അന്താരാഷ്ട്രവിപണിയില്‍ വില ഇടിയുന്നതിനിടെയാണ് കേന്ദ്രസര്‍ക്കാരിന്‍റെ  ഈ ക്രൂരതയെന്നും അദ്ദേഹം പറഞ്ഞു.

കൊവിഡ് മഹാമാരിയുടെ ഭാഗമായി മാസങ്ങളായി തുടരുന്ന സാമ്പത്തിക പ്രതിസന്ധി മൂലം പട്ടിണിയും തൊഴിലില്ലായ്മയും തൊഴില്‍ നഷ്ടവും നേരിടുകയാണ് ജനങ്ങള്‍. കാര്‍ഷിക, വ്യാവസായിക, വ്യാപാര മേഖലയിലെ തകര്‍ച്ചയെ തുടര്‍ന്നും ജനങ്ങള്‍ നിരാശയിലാണ്. ഇതിനിടെയാണ് സര്‍ക്കാരിന്‍റെ ഈ ക്രൂരതയെന്നും എ.കെ ആന്‍റണി കൂട്ടിച്ചേര്‍ത്തു. ഇന്ധനവില വര്‍ധനവിനെതിരെ ഇന്നു മുതല്‍ ജൂലായ് 4 വരെ കോണ്‍ഗ്രസ് നടത്തുന്ന ദേശവ്യാപക സമരത്തില്‍ എല്ലാ കോണ്‍ഗ്രസ് പ്രവര്‍ത്തകരും അണിചേരണമെന്നും അദ്ദേഹം ആവശ്യപ്പെട്ടു .കോണ്‍ഗ്രസിന്‍റെ സമരത്തിന് പിന്തുണ അര്‍പ്പിക്കാന്‍ ജനങ്ങള്‍ തയ്യാറാകണമെന്നും അദ്ദേഹം അഭ്യര്‍ത്ഥിച്ചു.

 

teevandi enkile ennodu para