തിരുവനന്തപുരം : തന്‍റെ പേരിൽ ഇരട്ടവോട്ട് എന്ന വാദം തെറ്റാണെന്ന് കഴക്കൂട്ടം നിയോജക മണ്ഡലത്തിലെ യുഡിഎഫ് സ്ഥാനാർത്ഥി ഡോ. എസ്.എസ് ലാൽ. തന്‍റേത് വോട്ട് ഇരട്ടിപ്പല്ലെന്നും സർക്കാർ സംവിധാനത്തിലെ പരാജയമാണ് ഇത്തരം ആരോപണങ്ങൾക്ക് പിന്നിലെന്നും ഡോ. എസ്.എസ് ലാൽ പറഞ്ഞു.

28 വർഷം പഴക്കമുള്ള തിരിച്ചറിയൽ കാർഡിലെ ഫോട്ടോ പോലും തിരിച്ചറിയാനാകാത്ത അവസ്ഥയിലായതിനാല്‍ പുതിയ കാർഡിനായി അക്ഷയ സെന്‍റർ വഴി അപേക്ഷ നല്‍കി. അതിന്‍റെ അടിസ്ഥാനത്തിൽ പുതിയ തിരിച്ചറിയൽ കാർഡ് ലഭിക്കുകയും ചെയ്തു. എന്നാൽ പുതിയ കാർഡ് തന്ന സമയത്ത് പഴയ കാർഡിലെ വിവരങ്ങൾ ഉദ്യോഗസ്ഥർ നീക്കം ചെയ്യാത്തതാണ് ഇപ്പോഴുള്ള ആരോപണങ്ങൾക്ക് കാരണം. ഇക്കാര്യം ശ്രദ്ധയിൽപ്പെട്ടപ്പോൾ തന്നെ പഴയ കാർഡ് റദ്ദാക്കണമെന്ന് കാട്ടി തെരഞ്ഞെടുപ്പ് കമ്മീഷന് പരാതിയും നൽകിയെന്നും എസ്.എസ് ലാല്‍ പറഞ്ഞു.

സിപിഎമ്മിന്‍റെ ഇരട്ട വോട്ടിനെതിരെ കോൺഗ്രസും താനും ഉന്നയിച്ച പരാതിയിൽ ഇപ്പോഴും ഉറച്ചു നിൽക്കുന്നുവെന്ന് എസ്.എസ് ലാല്‍ വ്യക്തമാക്കി. ഒരേ മുഖമുള്ളവരെയാണ് അവർ പല മണ്ഡലങ്ങളിൽ പല പേരിൽ വോട്ടറായി ചേർത്തിരിക്കുന്നത്. അതിനെതിരെ നൽകിയ പരാതിയിൽ ഉറച്ച് നിൽക്കുകയാണ്. തന്‍റേത് ഒരു ബൂത്തിൽ തന്നെ ഉണ്ടായ ഇരട്ടിപ്പ് എങ്ങനെയാണെന്ന് കൃത്യമായി മനസിലാകും. ഇത്തരത്തിലുള്ള തെറ്റായ വാദം നിരത്തി തടിയൂരാനാണ് സിപിഎം ശ്രമിക്കുന്നതെന്നും ഡോ. എസ്.എസ് ലാൽ പറഞ്ഞു.